Kryetari i PD-së Sali Berisha, në konferencën e sotme për mediet ka deklaruar se çdo kompani ndërtimi që do marrë pjesë në projektin e Portit të Durrësit do të futet në listën e zezë.
“Të gjitha këto e bëjnë situatën në Shqipëri eksplozive. Qytetarët shqiptarë nuk mund të qëndrojnë duarkryq përballë këtyre akteve që kalojnë çdo imagjinatë të vjedhjes së pasurive të tyre publike. Ndaj dhe PD do përdorë të gjithë format për të kundërshtuar këtë plaçkitje të pronës publike më të çmuar që kanë sot shqiptarët. Ne, natyrisht do u prijmë të gjitha nismave për dështimin e këtij projekti.
Jam këtu për të paralajmëruar se çdo kompani ndërtimi që do marrë pjesë në këtë projekt, do futet në listën e zezë. Dhe i paralajmëroj që të mos shndërrohen në shushunja për të vjedhur një pronë publike të shqiptarëve. Sepse po regjistrohen nënkontraktorë tani. Kjo që po bën Rama dhe Balluku është e pashembullt në histori.”– tha Berisha.
Ai kritikoi dhe deklaratën e bërë një ditë më parë nga kryeministri Edi Rama lidhur me investitorin arab që do të ndërtojë dhe Portin e jahteve në Durrës. Berisha tha se projekti për Manhatanin e Zagrebit i lavdëruar nga Rama është zmbrapsur nga opozita dhe qytetarët atje.
“Unë jam këtu për të përshëndetur qytetarët e Zagrebit, të cilët hodhën në kosh të plehrave, Manhatanin e Eagle Hills. Një kompani, nga më obskuret, një kompani, e cila e lidhur me vëllezërit Kariç, dhe të lidhur të gjithë me Lukashenkon dhe Vuçiçin. Edi Rama mbrëmë paraqiste kompaninë Eagle Hills si kompaninë që do ndërtonte Manhatanin e Zagrebit, në një kohë kur qytetarët e kishin hedhur në kosh projektin.
Shikoni ku e çon babëzia për Portin e Durrësit, që të mashtrojë publikisht. Përveç kësaj, kryetari i Bashkisë së Zagrebit kishte hapur garë, se nuk e kishte të veten kompaninë. Kurse Rama nuk hap garë, se e ka të veten kompaninë. 60 përqindëshin e ka të veten.”- tha ish-kryeministri.
