Majtas gazetari Adriatik Doçi, në mes polici Ermir Doda, djathtas Redon Pëllumbi (Skutera)
Policia ka shpallur në kërkim efektivin Ermir Doda lidhur me dhunën ndaj gazetarit Adriatik Doçi.
Dyshohet se Doda ka larguar nga vendi i ngjarjes me motor autorin e dyshuar të sulmit, Redon Skutera, shkruan Shqiptarja.
Efektivi Ermir Doda, banues në Bathore, është efektiv i Komisariatit 4 në Tiranë. Ai dyshohet si person me precedent kriminal, korrier droge në Angli e ‘ushtar’ një grupit criminal me lidhje deri në Dubai.
Dyshohet se emri i Dodës ka dalë nga dëshmia e dhënë në polici nga Redon Skutera, autori i dyshuar i dhunës ndaj gazetarit Adriatik Doçi.
Skutera e Doda po hetohen për pjesëmarrje në disa vrasje me pagesë.
Skutera nga ana e tij e ka emrin e parë Redon Pëllumbi dhe është person me precedent kriminal. ai është arrestuar një vit më parë për plagosje me dashje ndërsa është e paqartë sesi ka mundur t’i shpëtojë drejtësisë.
Ai është arrestuar gjithashtu edhe për shitje lëndësh narkotike. Mësohet se Skutera ka pranur autorësinë e sulmit. Gazetari Adriatik Doçi ka pohuar se nuk i njeh dhe nuk i ka dëgjuar kurrë si emra as Ermir Dodën dhe as Redon Skuterën.
Gazetari Doçi u dhunua pranë banesës së tij në Kamëz paraditen e 13 nëntorit.
Për ngjarjen u arrestua dje 32-vjeçari Skutera, lindur në Berat e banues në Tiranë ndërsa dyshohet se dhuna ndaj Doçit ka të bëjë me punën e tij si gazetar.
Dhuna ndaj gazetarit është denoncuar nga Unioni i Gazetarëve Shqiptarë e nga rrjeti rajonal i gazetarëve ‘Safejournalists’.
Majtas Ermir Doda, djathtas Redon Skutera
