Policia e Divjakës ka arrestuar një 33-vjeçar nga protesta e djeshme e banorëve të Divjakës, ku u thyen xhamat e kabinës në hyrje të parkut kombëtar të Divjakës.
Po ashtu është shpallur në kërkim edhe një tjetër.
“Specialistët për Hetimin e Krimeve të Komisariatit të Policisë Divjakë arrestuan në flagrancë shtetasin A. P., 33 vjeç, banues në Xeng, Divjakë, si edhe u shpall në kërkim shtetasi S. K., 40 vjeç, banues në Xeng, Divjakë, pasi gjatë protestës së zhvilluar ditën e djeshme, në Divjakë, kanë kryer veprime të dhunshme dhe si pasojë kanë thyer kabinën e vendosur në hyrje të parkut kombëtar të Divjakës.
Gjithashtu, në vijim të veprimeve procedurale për këtë rast, u referuan materialet në Prokurori dhe nisi procedimi në gjendje të lirë për shtetasit: E. Sh., J. M., N. Gj., D. P. dhe L. Gj.
Materialet procedurale i kaluan Prokurorisë pranë Gjykatës së Shkallës Parë Lushnjë, për veprime të mëtejshme.”- njoftoi sot Policia.
Ditën e djeshme dhjetëra banorë të Divjakës dolën të protestonin përsëri për të kundërshtuar vendimin e Ministrisë së Turizmit që vendos një tra dhe detyrimin për të hyrë me pagesë në parkun natyror që përfshin plazhin dhe Lagunën e Karavastasë.
Disa protestues u përplasën me policinë dhe thyen xhamat e kabinës që do shërbente për biletarinë.
