Qeveria skoceze nuk mund të mbajë një referendum të dytë për pavarësinë pa pëlqimin e qeverisë së Mbretërisë së Bashkuar. Kështu ka vendosur sot Gjykata Supreme e Mbretërisë së Bashkuar.
Ky vendim e kthen fushatën e Qeverisë skoceze që synonte të largohej nga Mbretëria e Bashkuar, një hap prapa.
Ministrja e parë Nicola Sturgeon dëshiron të mbajë një referendum më 19 tetor të vitit të ardhshëm. Por siç shkruan BBC, gjykata vendosi njëzëri se ajo nuk ka fuqinë për ta bërë këtë.
Presidenti i gjykatës Lord Reed tha se ligjet që krijuan Parlamentin e deleguar skocez në 1999 nënkuptonin se ai nuk kishte fuqi mbi fushat e kushtetutës, duke përfshirë bashkimin midis Skocisë dhe Anglisë. Këto çështje janë të rezervuara për Parlamentin e Mbretërisë së Bashkuar, tha ai, dhe në mungesë të një marrëveshjeje midis dy qeverive, Parlamenti skocez nuk është në gjendje të nxjerrë ligje për një referendum.
Ai hodhi poshtë gjithashtu argumentin e qeverisë skoceze se çdo referendum do të ishte thjesht “këshillimor” dhe nuk do të kishte asnjë efekt ligjor për bashkimin, ku njerëzve u kërkohet vetëm të japin mendimin e tyre nëse Skocia duhet të bëhet apo jo një vend i pavarur.
Lordi Reed tha: “Një referendum i mbajtur në mënyrë të ligjshme do të kishte pasoja të rëndësishme politike në lidhje me bashkimin dhe Parlamentin e Mbretërisë së Bashkuar.”
Zonja Sturgeon shkroi në Twitter se ishte e zhgënjyer nga vendimi, por respektoi vendimin e gjykatës dhe theksoi se gjyqtarët nuk e bëjnë ligjin dhe vetëm e interpretojnë atë.
