Ish-gjenerali serb Ratko Mlladiç, i njohur si ‘kasapi i Bosnjës’ është në gjendje të rëndë shëndetësore në burgun holandez ku po kryen dënimin për gjenocid e krime kundër njerëzimit. Sipas raportimeve të mëparshme në mediat serbe, ai aktualisht është në gjendje kritike.
“Ai u dërgua në spitalin e burgut për shkak të dobësisë së përgjithshme, inflamacionit të mushkërive dhe ankesave për probleme të zemrës. Kontrollet vazhdojnë. Ne u informuam se rezultatet do merren vesh më vonë.” – tha djali i tij, Darko Mlladiç.
Mlladiç ishte komandanti i Ushtrisë së Republika Srpska, e krijuar në Bosnje-Hercegovinë në fillim të Luftës Civile të vendit në mes të shpërbërjes së Jugosllavisë në vitet 1990.
Ai dhe forcat nën komandën e tij ishin të lidhur me gjenocidin e kryer në Bosnje, veçanërisht në Srebrenicë pasi forcat serbe pushtuan një enklavë që supozohet se ishte nën mbrojtjen e paqeruajtësve të OKB-së.
Mlladiç është gjithashtu i njohur për rrethimin e përgjakshëm 1.425-ditor të Sarajevës nga forcat e tij, më i gjati kundër një kryeqyteti në historinë e luftës moderne.
Pas përfundimit të luftës me Marrëveshjen e Dejtonit të 21 nëntorit 1995, Mlladiç u zhduk për më shumë se një dekadë. Ai u gjet në vitin 2011e u dorëzua në Gjykatën e Hagës.
Gjyqi ndaj Mlladiç filloi më 16 maj 2012 dhe përfundoi në dhjetor 2016.
Gjyqi, që zgjati më shumë se 500 ditë, thirri 591 dëshmitarë dhe pa gati 10,000 prova të pranuara nga gjykata.
Në vitin 2017, Gjykata Penale Ndërkombëtare për ish-Jugosllavinë në Hagë njëzëri e shpalli Mlladiçin fajtor për masakrën e Srebrenicës. Ai u shpall fajtor për 10 nga 11 pikat në aktakuzë.
Ai u përball me dy akuza për gjenocid, mes krimeve të tjera, por megjithëse gjykata e shpalli fajtor për rolin e tij në Srebrenicë, ai u shpall i pafajshëm për gjenocid në gjashtë komuna të tjera boshnjake.
Ai u dënua gjithashtu për një sërë krimesh kundër njerëzimit, duke përfshirë persekutimin, shfarosjen, vrasjen, vrasjen si shkelje e ligjeve të luftës dhe dëbimet e detyruara.
78-vjeçari apeloi dënimin e tij për gjenocid dhe krime kundër njerëzimit në një gjykatë në Hagë, por kjo u refuzua.
Gjenocidi i Srebrenicës
Më shumë se 8,000 burra dhe djem myslimanë boshnjakë u vranë kur forcat serbe të Bosnjës sulmuan qytetin lindor të Srebrenicës në korrik 1995, pavarësisht nga prania e trupave paqeruajtëse holandeze.
Forcat serbe po përpiqeshin të merrnin territorin nga myslimanët boshnjakë dhe kroatët për të formuar një shtet. Këshilli i Sigurimit i OKB-së e kishte shpallur Srebrenicën një ‘zonë të sigurt’ në pranverën e vitit 1993. Megjithatë, trupat e udhëhequra nga Mlladiç pushtuan zonën e OKB-së.
Trupat holandeze nuk arritën të vepronin ndërsa forcat serbe pushtuan zonën, duke vrarë rreth 2,000 burra dhe djem vetëm më 11 korrik.
Rreth 15,000 banorë u larguan në malet përreth, por trupat serbe kapën e vranë 6,000 njerëz të tjerë. Trupat e viktimave janë gjetur në 570 vende në të gjithë vendin.
Në vitin 2007, Gjykata Ndërkombëtare e Drejtësisë në Hagë vendosi se në Srebrenicë ishte kryer gjenocid.
