Mijëra njerëz protestuan në Dublin të shtunën, duke i bërë thirrje qeverisë të adresojë krizat e strehimit dhe të pastrehëve në Irlandë. Ndërsa protesta ka mbështetjen e të famshmëve irlandezë, aktivistët e krahut të djathtë argumentojnë se gjendja e vështirë është e lidhur me emigracionin.
Protesta u organizua nga ‘Raise the Roof’, një koalicion i politikanëve, sindikatave dhe organizatave bamirëse për të pastrehët. Grupi kërkon që qeveria irlandeze të ndërtojë shtëpi të përballueshme, të deklarojë një ‘të drejtë ligjore për strehim’ dhe të forcojë të drejtat e qiramarrësve.
E mbështetur nga partitë më të mëdha opozitare të Irlandës, Sinn Fein e Partia Laburiste dhe e reklamuar nga persona të famshëm si aktori i ‘Game of Thrones’, Liam Cunningham dhe këngëtarja Christy Moore, demonstrata vjen teksa Irlanda përballet me sfidat e të pastrehëve rekord, rritjes së madhe të qirasë, mungesës së strehimit dhe një fluksi të paparë refugjatësh dhe azilkërkuesish.
Organizatorët e protestës i kërkuan qeverisë të rrisë ofertën e banesave, duke përfshirë edhe marrjen e pronave të lira.
“Irlanda nuk ka hapësirën për njerëzit që i mirëpret.” – shkroi të premten media konservatore Gript. “Na mungojnë shtëpitë dhe infrastruktura e përgjithshme për të mbështetur këtë shkallë të ardhjes së re. Irlanda është në fakt plot.”
Deri në fund të vitit, Irlanda do ketë pranuar më shumë se 70,000 refugjatë ukrainas, me një kosto për shtetin prej 642 milionë dollarësh. Vlerësohet se gjysma e të sapoardhurve jetojnë në hotele, bujtina dhe ndërtesa të tjera. Ndërkohë, një rekord prej 11,397 irlandezësh mbetën të pastrehë muajin e kaluar, sipas shifrave nga organizata bamirëse për të pastrehët, Focus Ireland.
Përveç ukrainasve, Irlanda pranoi rreth 10,000 azilkërkues nga vende të tjera në nëntë muajt e parë të vitit, shifra më e lartë që nga viti 2001. Me numrin total të të huajve të pranuar në vitin 2022 që tejkalon popullsinë e qytetit të katërt më të madh të Irlandës, Galway , vendasit në disa zona kanë protestuar ndaj të ardhurve të rinj, shumica e të cilëve erdhën nga Nigeria, Gjeorgjia dhe Somalia.
