Ministri i Jashtëm Letonez Edgars Rinkevics i kërkoi NATO-s të ‘lejojë’ Ukrainën të përdorë armatimin e saj të marrë nga Perëndimi për sulme të thella në territorin rus.
Kryediplomati i bëri komentet në një intervistë me Bloomberg në margjinat e takimit të ministrave të jashtëm të NATO-s në Bukuresht të martën.
Në veçanti, armatimi duhet të përdoret për të sulmuar vendet e përdorura nga Moska për të organizuar sulme me raketa kundër infrastrukturës së rëndësishme të Ukrainës, sugjeroi Rinkevics.
“Ne duhet të lejojmë ukrainasit të përdorin armë për të shënjestruar vendet e raketave ose fushat ajrore nga ku ato operacione janë duke u nisur.” – tha ai.
Ndërsa Moska e ka paralajmëruar në mënyrë të përsëritur Perëndimin kundër ‘furnizimit’ të Ukrainës me armë të ndryshme, duke sugjeruar se një sjellje e tillë mund të rezultojë në një konflikt të drejtpërdrejtë midis aleancës së NATO-s të udhëhequr nga SHBA-ja dhe Rusisë, Rinkevics i hodhi poshtë shqetësimet e tilla. Blloku ‘nuk duhet të ketë frikë’ nga përshkallëzimi, tha ai.
Letonia, së bashku me shtetet e tjera baltike, ka qenë ndër mbështetësit më të zëshëm të Kievit në konfliktin e vazhdueshëm midis Rusisë dhe Ukrainës. Zyrtarët e lartë të vendit kanë vizituar vazhdimisht Kievin për të treguar mbështetjen e tyre, me vizitën e fundit që erdhi gjatë fundjavës kur Rinkevics, së bashku me kolegët e tij nga Lituania, Estonia, Finlanda, Suedia, Norvegjia dhe Islanda takuan presidentin ukrainas Vladimir Zelensky.
Në javët e fundit, Rusia ka lëshuar në mënyrë të përsëritur raketa masive lundrimi dhe dronë vetëvrasës kundër rrjetit elektrik dhe instalimeve ushtarake të Ukrainës. Sulmet pasuan një shpërthim që dëmtoi urën Kerç që lidh Rusinë kontinentale me Gadishullin e Krimesë.
