Presidenti i SHBA-ve Joe Biden thotë se do të ishte i gatshëm të takonte Vladimir Putinin e Rusisë “nëse në fakt ka një interes që ai të vendosë se po kërkon një mënyrë për t’i dhënë fund luftës”.
Duke iu drejtuar gazetarëve së bashku me presidentin francez Emmanuel Macron, ai theksoi se Putin nuk e kishte bërë ende këtë.
Të dy liderët theksuan se do të vazhdojnë të qëndrojnë kundër luftës së Rusisë.
Në përgjigje, Kremlini tha se presidenti Putin mbetet i hapur për bisedime që synojnë “të garantojnë interesat tona”.
Megjithatë, zëdhënësi Dmitry Peskov u tha gazetarëve se Moska me siguri nuk ishte e gatshme të pranonte kushtet e SHBA-ve: “Çfarë tha Presidenti Biden në fakt? Ai tha se negociatat janë të mundshme vetëm pasi Putin të largohet nga Ukraina.”
BBC shkruan se udhëheqësi francez e bëri të qartë se ata kurrë nuk do t’i kërkonin Ukrainës të bënte një kompromis që e konsideronte të papranueshëm.
Pas bisedimeve të tyre në Shtëpinë e Bardhë, presidentët e SHBA-së dhe Francës nxorën një deklaratë të përbashkët duke premtuar “mbështetje të vazhdueshme për mbrojtjen e sovranitetit dhe integritetit territorial të Ukrainës”, duke rritur shpërndarjen e sistemeve të mbrojtjes ajrore dhe planet për një konferencë ndërkombëtare mbi Ukrainën në Paris më 13 dhjetor.
