Presidenti ukrainas Vladimir Zelensky ka njoftuar masa të reja që synojnë ndalimin e institucioneve fetare që konsiderohen se kanë lidhje me Rusinë. Ai tha se masa ka për qëllim të mbrojë ‘pavarësinë shpirtërore’ të kombit në mes të konfliktit të Kievit me Moskën.
Objektivi kryesor i presidentit është Kisha Ortodokse Ukrainase, më e madhja e vendit, e cila është e lidhur me Patriarkanën e Moskës.
Deklarata vjen pasi SBU-ja, agjencia inteligjente e Ukrainës, nisi atë që e quajti një veprim ‘të kundër inteligjencës’ në disa vende të Kishës Ortodokse të Ukrainës në tre rajone. Bastisjet kishin në shënjestër të paktën tetë objekte fetare të premten, me qëllim identifikimin e individëve të dyshuar për minimin e sovranitetit të Ukrainës.
Duke shkruar në Telegram, Zelensky tha të enjten se Këshilli Kombëtar i Sigurisë dhe Mbrojtjes kishte mbajtur një takim, i cili u përqendrua në ‘fakte të shumta të lidhjeve të qarqeve të caktuara fetare në Ukrainë me shtetin agresor, Rusinë’.
Këshilli ka udhëzuar qeverinë e Ukrainës që të prezantojë një ligj për ta bërë të pamundur që ‘organizatat fetare të lidhura me qendrat e ndikimit’ në Rusi të veprojnë në vend, tha Zelensky.
Ndërkohë, mbikëqyrësi shtetëror i Ukrainës përgjegjës për mbikëqyrjen e sferës fetare u urdhërua të përcaktojë nëse Kisha Ortodokse e Ukrainës ka lidhje fetare me Patriarkanën e Moskës.
Këshilli gjithashtu akuzoi shërbimet speciale ruse për ‘aktivitete subversive’ në sferën fetare dhe udhëzoi të gjitha organet e sigurisë kombëtare që të ‘identifikojnë dhe godasin’ këto përpjekje të supozuara. Sipas Zelenskyt, Kievi do vendosë gjithashtu sanksione personale ndaj një numri individësh, me listën që pritet të publikohet në të ardhmen e afërt.
