Fermerët në shtetin më të populluar të Gjermanisë duhet të frenojnë menjëherë përdorimin e teknikave efektive të plehërimit nën një grup të ri kufizimesh që me sa duket synojnë ta bëjnë industrinë më ‘të gjelbër’.
Që nga e enjtja, fermerëve në North Rhine-Westphalia u kërkohet të përdorin 20% më pak pleh nitrat në zonat që mendohet se kanë nivele ‘problematike’ të kimikatit – një përcaktim që tani përfshin një të tretën e tokës bujqësore të përdorshme të provincës.
Rregullat duket të jenë të papëlqyeshme për disa fermerë vendas dhe zyrtarë politikë. Erich Gussen, nënkryetar i Shoqatës Bujqësore Rhenish, paralajmëroi se rregulloret e reja do nënkuptojnë një cilësi më të ulët të të korrave, duke lënë të kuptohet se fermerët nuk do t’i pranojnë rregullat pa luftë.
“Ka një zemëratë të madhe mes fermerëve, gjë që na shqetëson vërtet!” – tha ai për gazetën gjermane Bild.
“Nëse një fushë me grurë ka nevojë për 200 kg pleh për rendiment optimal, fermerët tani do detyrohen të përdorin 40 kg më pak. Kjo do të thotë një rënie e rendimentit dhe cilësia e grurit do jetë më e dobët!” – shpjegoi Gussen.
Koha e masës, që vjen pikërisht përpara Krishtlindjeve me pak njoftim paraprak, duket gjithashtu se ka gjasa të rrisë shqetësimin.
Ministrja e Bujqësisë e Mbrojtjes së Konsumatorit të North Rhine-Westphalia, Silke Gorissen, e përshkroi zgjerimin e minutës së fundit të zonave me nivel të ulët të nitrateve si një ‘hap mbrapa’. Gorissen pohoi se ajo kishte kërkuar prej kohësh përjashtime për fermerët, të cilët tashmë e kishin dëshmuar veten si kujdestarë të përgjegjshëm të tokës.
Një nismë e ngjashme që po zhvillohet në Holandë në muajt e fundit ka hasur në një shkallë të lartë të rezistencës lokale. Amsterdami thuhet se po kërkon të blejë ose mbyllë me forcë deri në 3,000 ferma për të përmbushur objektivat mjedisore të BE-së, edhe pse avokatët e bujqësisë në vend pretendojnë se kanë disa nga teknikat bujqësore më të përparuara në botë.
