Më shumë se 3 mijë policë morën pjesë në operacionin e zhvilluar në të gjithë Gjermaninë
Njëzet e pesë persona janë arrestuar në të gjithë Gjermaninë, pasi dyshohen se po komplotonin për të rrëzuar qeverinë.
Grupi i figurave të ekstremit të djathtë dhe me ish-ushtarakë planifikonte të sulmonte ndërtesën e parlamentit, Reichstag, dhe të merrte pushtetin.
Siç shkruan BBC, një gjerman i përshkruar si një princ i quajtur Heinrich XIII, 71-vjeç, dyshohet se ka qenë kryesor në planet e tyre. Sipas prokurorëve federalë, ai është një nga dy drejtuesit e dyshuar në mesin e të arrestuarve në 11 shtete gjermane.
Komplotuesit thuhet se përfshijnë anëtarë të lëvizjes ekstremiste Reichsbürger (Qytetarët e Rajhut]) e cila ka qenë prej kohësh nën vështrimin e policisë gjermane për sulme të dhunshme dhe teori konspirative raciste. Ata gjithashtu refuzojnë të njohin shtetin modern gjerman.
Rreth 50 burra dhe gra dyshohet se kanë qenë pjesë e grupit që thuhet se kanë komplotuar për të përmbysur republikën dhe për ta zëvendësuar atë me një shtet të ri të modeluar sipas Gjermanisë së vitit 1871 – një perandori e quajtur Rajhu i Dytë.
“Ne nuk kemi ende një emër për këtë grup.”– tha një zëdhënëse e zyrës së prokurorit federal.
Bastisjet u zhvilluan në pjesën më të madhe të vendit dhe dy persona u arrestuan në Austri dhe Itali, njoftoi agjencia gjermane e lajmeve DPA. Të arrestuarit do të merreshin në pyetje më vonë gjatë ditës.
Ministri i Drejtësisë Marco Buschmann shkroi në Tëitter se një operacion i madh anti-terror po ndodhte dhe se ishte planifikuar një sulm i dyshuar i armatosur ndaj organeve kushtetuese.
Prokurori federal tha se grupi kishte komplotuar një grusht shteti të dhunshëm që nga nëntori 2021. Ish anëtarët e ushtrisë ishin gjithashtu një pjesë e rëndësishme e komplotit të grushtit të shtetit, thanë raportet. Ata përfshinin ish-ushtarë elitë nga njësitë speciale.
Komplotuesit kishin krijuar tashmë plane për të sunduar Gjermaninë, tha zyra e prokurorit federal. Anëtarët e kuptuan se mund t’i realizonin qëllimet e tyre vetëm me “mjete ushtarake dhe dhunë kundër përfaqësuesve të shtetit” dhe kjo përfshinte kryerjen e vrasjeve. Transmetuesi publik ZDF raportoi se një ish-deputet i ekstremit të djathtë të dhomës së ulët të parlamentit, Bundestag, ishte gjithashtu pjesë e komplotit dhe ishte planifikuar për t’u vendosur si ministër i drejtësisë i grupit, me princin Heinrich si udhëheqës.
