Një gjykatë në Argjentinë ka dënuar zëvendës presidenten Cristina Fernandez de Kirchner me gjashtë vjet burg për korrupsion.
Siç shkruan BBC, Fernández e cila është 69 vjeçe, u shpall fajtore për “administrim mashtrues” për dhënien e kontratave të punëve publike një miku. Por ajo nuk ka gjasa të kryejë dënimin me burg.
Fernández ka njëfarë imuniteti përmes roleve të saj në qeveri dhe pritet të nisë një proces të gjatë apelimi. Ajo gjithashtu është përjashtuar përgjithmonë nga funksionet publike, por do të vazhdojë të jetë në postin e nënkryetares derisa çështja të kalojë në gjykatat më të larta.
Prokurorët kishin kërkuar një dënim me 12 vjet burg.
Fernández tha se akuzat kundër saj ishin të motivuara politikisht. Duke folur pas vendimit, ajo e përshkroi veten si viktimë e një “mafie gjyqësore”, raporton agjencia e lajmeve Associated Press.
Para marrjes së vendimit, ajo gjithashtu kishte akuzuar prokurorët se e kishin gënjyer dhe shpifur ndaj saj. Është hera e parë ndonjëherë që një nënkryetar dënohet për një krim gjatë kohës që ishte në detyrë në Argjentinë.
Prokurorët thanë se Fernández kishte udhëhequr një partneritet të paligjshëm gjatë kohës kur ajo ishte presidente e Argjentinës nga 2007 deri në 2015. Ata thanë se ajo kishte krijuar një skemë ryshfeti që drejtonte kontratat fitimprurëse të punës publike drejt miqve të saj në këmbim të ryshfetit.
Biznesmeni Lázaro Báez, pronar i një firme ndërtimi i cili u akuzua si përfituesi kryesor i skemës, u dënua gjithashtu me gjashtë vjet burg. Ai ishte dënuar tashmë me 12 vjet burg vitin e kaluar për pastrim parash. Njëmbëdhjetë persona të tjerë ishin në gjyq. Shtatë u shpallën fajtorë dhe u dënuan me nga tre vjet e gjysmë deri në gjashtë vjet burg, tre u liruan dhe njërit iu pushua çështja.
Prokurorët thanë se ata zbuluan parregullsi në dhjetëra tendera për punë publike në provincën jugore të Santa Cruz, bastioni politik i Fernandez. Shumë nga projektet e ndërtimit nuk u përfunduan kurrë.
