New York Times po përballet me një grevë 24-orëshe këtë të enjten nga qindra gazetarë dhe punonjës të tjerë, të cilët kërkojnë rritje page. Siç raportojnë mediet amerikane, kjo është greva e parë e këtij lloji ndaj gazetës në më shumë se 40 vjet.
Punonjësit e redaksisë dhe anëtarët e tjerë të “NewsGuild” thonë se janë të ngopur me pazaret që janë zvarritur që nga skadimi i kontratës së tyre të fundit në mars 2021.
Sindikata njoftoi javën e kaluar se më shumë se 1 mijë e 100 punonjës do të bënin një ndalesë pune 24-orëshe duke filluar në orën 00:01 të mëngjesit të së enjtes nëse të dyja palët nuk arrijnë një marrëveshje kontrate.
“Është zhgënjyese që ata po ndërmarrin një veprim kaq drastik, duke pasur parasysh angazhimin e qartë që kemi treguar për të negociuar rrugën tonë drejt një kontrate që u ofron gazetarëve të Times rritje të konsiderueshme pagash, përfitime udhëheqëse në treg dhe kushte fleksibël pune.”- tha Meredith Kopit Levien, presidentja dhe shefja ekzekutive e gazetës, në një email drejtuar kompanisë të mërkurën mbrëma.
“NewsGuild of New York”, e cila përfaqëson gazetarët dhe punonjësit e tjerë, tha në një deklaratë se largimi ishte “për shkak të dështimit të kompanisë për të bërë pazare në mirëbesim, për të arritur një marrëveshje të drejtë kontrate me punëtorët dhe për të përmbushur kërkesat e tyre”.
Akti i protestës, i cili nuk është organizuar nga punonjësit prej dekadash, do të lërë shumë nga tavolinat kryesore të saj pa stafet e tyre, duke krijuar një sfidë për organizatën e lajmeve.
Një ekzekutiv i cili kërkoi anonimitetin, pranoi për CNN të mërkurën se ndërprerja e punës sigurisht që do të krijonte vështirësi. Por, shtoi se menaxhmenti është gati për momentin dhe mund të mbështetet në burimet e tjera të gazetës, si stafi i saj ndërkombëtar, i cili kryesisht nuk është pjesë e sindikatës, për të mbushur boshllëqet.
Joe Kahn, redaktor ekzekutiv i gazetës, tha në një shënim për stafin, “Ne do të prodhojmë një raport të fortë të enjten. Por do të jetë më e vështirë se zakonisht.”
