Ish-zëvendëskryeministri Arben Ahmetaj ka mohuar t’i jenë paguar hotelet e udhëtimet jashtë vendit nga Klodian Zoto i shpallur në kërkim, pronar i kompanisë Integrated Energy BV Shpk, që ka marrë koncesionet e inceneratorëve.
Në një koment për BIRN, ai tha se akuzat janë të pavërteta ndërsa nuk dha hollësi idhur me udhëtimet e tij jashtë vendit duke i konsideruar ato si private.
“Nuk është e vërtetë. Akuza publike apo jo publike le të ketë. Nuk ka asnjë lidhje. Unë kam qenë në gjithë botën mbarë.” – tha Ahmetaj.
Emri i Ahmetajt doli pasi gazetari Adriatik Doçi, kallëzoi në SPAK dy prokurorët Klodian Braho e Eneid Nakuçi, për fshehje provash ndaj Ahmetajt lidhur me hetimet për inceneratorin e Elbasanit.
Në kallëzimin e depozituar sot në SPAK, gazetari Adriatik Doçi, akuzon dy prokurorët për fshehje provash për të mbrojtur Ahmetajn.
“Janë fshehur hetimet nga dy prokurorët e SPAK, për të mbrojtur Arben Ahmetajn. Kam kallëzuar Arben Ahmetajn për përfitimet që ka patur nga Klodian Zoto. Në kompjuterin e tij janë gjetur pagesa për ish-ministrin Ahmetaj.” – tha Doçi.
Prokurorët Braho e Nakuçi që po hetojnë dosjen nuk pranuan të komentojnë kallëzimin ndaj tyre, duke thënë se çështja është ende në hetim.
