Policia bastisi vendbanimet rome pranë Athinës për të dytën ditë radhazi, ndërsa tensionet vazhdojnë për vrasjen nga policia të një adoleshenti rom në Greqinë veriore.
Një numër njerëzish janë arrestuar që nga e enjtja nga vendbanime të ndryshme rome në qytetet Zefyri, Menidi, Neoktista Aspropyrgou dhe Ano Liossia, shumica për akuza të lidhura me drogën, tha policia.
Disa pjesë të Greqisë janë përfshirë nga dhuna pasi një djalë 16-vjeçar rom u qëllua për vdekje nga një oficer policie në Selanik, qyteti i dytë më i madh i Greqisë, të hënën.
“Ne duam drejtësi. Ky ishte një krim racist”, tha të premten për mediat vendase Panagiotis Sabanis, kreu i Federatës Rome të Maqedonisë Qendrore dhe Perëndimore.
“Ka racizëm kundër nesh në Greqi. Ky nuk është incidenti i parë që policia qëllon një rom vetëm sepse ai është rom.”
Viktima u qëllua në kokë gjatë një ndjekjeje nga policia pasi ai dyshohet se doli nga një pikë karburanti pa paguar një faturë prej 20 eurosh.
Një oficer policie 34-vjeçar që qëlloi adoleshentin është pezulluar dhe përballet me akuzën e vrasjes së mbetur në tentative.
