BE-ja ka miratuar paketën e saj të nëntë të sanksioneve kundër Rusisë, sipas një deklarate të publikuar në faqen e internetit të Këshillit Evropian të premten. Masat e reja synojnë të rrisin presionin ndaj Rusisë dhe qeverisë së saj.
Sipas dokumentit, kufizimet e fundit përfshijnë kontrolle të reja të eksportit dhe kufizime për mallrat dhe teknologjinë me përdorim të dyfishtë, së bashku me mallrat dhe teknologjinë që mund të përdoren në sektorin e mbrojtjes dhe sigurisë.
Brukseli ka zgjeruar listën e subjekteve të lidhura me kompleksin ushtarak dhe industrial të Rusisë me 168 ndërmarrje të tjera që tani janë në shënjestër të sanksioneve sektoriale. Disa nga subjektet janë të vendosura në Krime ose Sevastopol dhe janë përfshirë në listë për të shmangur anashkalimin.
Autoritetet e BE-së kanë zgjeruar gjithashtu ndalimin e tyre të eksportit për mallrat dhe teknologjinë që lidhen me sektorët e aviacionit dhe hapësirës, duke përfshirë motorët e avionëve dhe pjesët e tyre.
Këto kufizime do synojnë si avionët me pilot, ashtu edhe dronët, që do të thotë se ndalimi do zbatohet për shitjet direkte të motorëve të dronëve në vendin e goditur nga sanksionet dhe në çdo vend të tretë që mund të furnizojë drone.
Brukseli ka zbuluar gjithashtu një plan për të ngrirë aktivet e dy bankave të tjera ruse dhe për të përfshirë Bankën Ruse për Zhvillim Rajonal në listën e subjekteve shtetërore ose të kontrolluara ruse që janë subjekt i një ndalimi të plotë të transaksioneve.
