Një akuarium gjigant me një milion litra ujë në hollin e Radisson Blu në Berlin ka shpërthyer, duke përmbytur hotelin dhe rrugët aty pranë.
“AquaDom” – shtëpia e 1500 peshqve, është 15.85 m i lartë dhe u përshkrua nga BBC si akuariumi cilindrik më i madh në botë.
Dy persona u plagosën nga rënia e xhamit pas shpërthimit.
Policia tha se kishte pasur dëme “të pabesueshme“. Pamjet e publikuara nga vendi i ngjarjes tregojnë një rezervuar bosh me ujë që derdhet në hollin e hotelit.
Një zëdhënës i brigadës së zjarrfikësve të Berlinit tha për BBC se shumica e peshqve kishin ngordhur, ndërsa moti i ftohtë i kishte bërë përpjekjet e shpëtimit më të vështira. Rezervuari përmbante më shumë se 100 lloje të ndryshme.
Megjithatë, zyrtari i brigadës së zjarrfikësve James Klein tha më vonë për mediat lokale se “disa dhjetëra” peshq ishin gjetur të gjallë në vendet ku ishte mbledhur uji i mbetur. Ai tha se ata po ristrehoheshin në akuariume të tjera.
Gjithashtu, Associated Press citoi zyrtarët të thoshin se ata po punonin për të shpëtuar 400-500 peshq të tjerë në rezervuarë më të vegjël nën hollin e hotelit, të cilët ishin privuar nga oksigjeni për shkak të katastrofës.
Paul Maletzki po qëndronte në katin e katërt me të dashurën e tij kur ndodhi ngjarja. Ai përshkroi se u zgjua nga një zhurmë e fortë dhe dridhje. Kur shikoi poshtë në holl, pa ujë që rridhte nëpër të. Ata dhe të ftuar të tjerë u shoqëruan më vonë nga hoteli, nga policia e armatosur.
Kryetarja e bashkisë së Berlinit Franziska Giffey shkoi në hotel për të parë dëmet dhe e përshkroi shpërthimin e tankut si një cunami.
