Teherani ka dyfishuar kapacitetin e tij për pasurimin e uraniumit, njoftoi të shtunën kreu i Organizatës Iraniane të Energjisë Atomike (AEOI), Mohammad Eslami.
“Tani këmi arritur nivelin më të lartë në historinë e industrisë bërthamore të vendit, duke tejkaluar normat e mëparshme me më shumë se dy herë”, u tha Eslami ligjvënësve në Teheran, siç citohet nga agjencia e lajmeve Tasnim.
Ai shtoi se prodhimi i energjisë nga centralet bërthamore ‘ka ofruar përfitime të konsiderueshme ekonomike për Iranin, ka zvogëluar përdorimin e lëndëve djegëse fosile dhe ka parandaluar dëmtimet mjedisore’.
Njoftimi vjen përpara një vizite të ekspertëve nga Agjencia Ndërkombëtare e Energjisë Atomike (IAEA) në Iran.
“Me ftesë të Iranit, një ekip teknik i IAEA-s do jetë në Teheran të dielën,” tha zëdhënësja e mbikëqyrësit bërthamor në fillim të kësaj jave. Qëllimi i vizitës është të adresojë ‘çështjet e pazgjidhura të raportuara më herët’, shtoi ajo. Shefi i agjencisë, Rafael Grossi, nuk pritet të jetë pjesë e ekipit këtë herë.
Udhëtimi do përqendrohet në ‘grimcat e shumta të uraniumit me origjinë antropogjene’ të raportuara në tre vende në vitin 2019, të supozuara se ishin ish-vendndodhje bërthamore të padeklaruara më parë nga IAEA.
