Aktori dhe komediani i njohur amerikan Danny DeVito ka zbuluar rrënjët e tij nga Kalabria. Gjatë një interviste, DeVito tha se gjyshja e tij ishte kalabreze dhe fliste dialektin gegë. Më pas nisi të shpjegonte edhe se çfarë është gegërishtja për të pranishmit në studio.
“Një nga gjyshet e mia ishte nga Kalabria, në fund të çizmes (i referohet formës së hartës së Italisë) dhe atje është Shqipëria…
Unë e kam njohur atë vetëm kur isha një fëmijë i vogël, ajo ishte mbi 80-vjeç dhe po vdiste, e shtrirë në krevat, ajo kishte thyer mesin… histori tragjike, më falni që e përmenda. Ideja është se ajo fliste një gjuhë, një dialekt që quhet gegë. Disa njerëz mund ta dinë se çfarë është. Është një gjuhë shqiptare, hibride.”- thotë DeVito.
Ai më pas shton se gjyshit të tij italian nuk i pëlqente kjo gjuhë sepse gjyshja e fliste me shoqet e veta dhe ai s’e kuptonte. DeVito thotë se gjatë udhëtimeve të tij është takuar me një kalabrez i cili e fliste gjuhën dhe atij i është dukur shumë e bukur, “muzikale” shprehet ai. Por shton se vetë s’ka mësuar kurrë ta flasë dhe di të thotë vetëm “sh….”, kur do që t’i thotë dikujt “Pusho!“.
Ha. Good old @DannyDeVito, explaining his Albanian origin. He even remembers how his grandma, bless her, spoke Gheg/Gegë, the Albanian dialect of north Albania / Kosovo, also found in medieval Albanian communities in Calabria and Sicily. pic.twitter.com/KQ1VZXIu1B
— Petrit Selimi (@Petrit) December 19, 2022
Gegërishtja ose Dialekti gegë (Geg. gegnisht) është njëri nga dy dialektet e gjuhës shqipe, që flitet nga shqiptarët gegë në veri të Shqipërisë, në Kosovë, në Maqedoni si dhe në Serbi dhe Mal të Zi.
DeVito lindi në Nju Xhersi më 17 nëntor 1944 dhe ishte djali i Daniel DeVito Sr. (pronar i një biznesi të vogël) dhe Julia DeVito, të cilët ishin me origjinë italiane: konkretisht nga San Fele, Basilicata, si dhe Kalabria.
Ai u rrit në një familje me pesë anëtarë, me prindërit dhe dy motrat më të mëdha.
