Rusia thotë se do të dërgojë muzikantë dhe këngëtarë në vijën e parë të luftës së saj në Ukrainë për të rritur moralin e trupave.
Siç shkruan BBC, Ministria e Mbrojtjes njoftoi formimin e “brigadës krijuese të vijës së parë” këtë javë, duke thënë se do të përfshijë gjithashtu interpretues të cirkut.
Ministri rus i Mbrojtjes Sergei Shoigu vizitoi trupat e vijës së parë në Ukrainë. Në një deklaratë të postuar në Telegram, ministria e mbrojtjes tha se Shoigu “fluturoi rreth zonave të dislokimit të trupave dhe kontrolloi pozicionet e avancuara të njësive ruse në zonën e operacionit ushtarak special”, duke iu referuar pushtimit të plotë të Ukrainës nga Moska më 24 shkurt.
Duke komentuar vizitën e raportuar të ministrit rus Shoigu, zëdhënësi ushtarak i Ukrainës Serhiy Cherevatyi u tha kanaleve televizive ukrainase: “Unë nuk besoj vërtet se ai është kaq i guximshëm” për të udhëtuar në fushën e betejës.
Kjo vjen pasi zyrtarët e mbrojtjes në Mbretërinë e Bashkuar thanë se morali i ulët vazhdon të jetë “në pjesën më të madhe të forcës ruse”.
Mbretëria e Bashkuar vë në pikëpyetje nëse brigada e re në të vërtetë do të shpërqendronte trupat, të cilët kanë qenë të shqetësuar kryesisht për “normat shumë të larta të viktimave, udhëheqjen e dobët, problemet e pagave, mungesën e pajisjeve dhe municioneve dhe mungesën e qartësisë rreth objektivave të luftës”.
Sipas gazetës ruse RBC news, brigada do të përbëhet nga trupa të mobilizuara nën drejtimin e rekrutimit të Presidentit Vladimir Putin, si dhe “artistë profesionistë që hynë vullnetarisht në shërbimin ushtarak”.
Njësia e re do të ketë për detyrë të mbajë “një gjendje të lartë morale, politike dhe psikologjike ndërmjet pjesëmarrësve të operacionit të posaçëm ushtarak”, citoi gazeta të ketë thënë ministria e mbrojtjes.
