George Santos, i cili bëri histori muajin e kaluar kur arriti një fitore të vështirë në Nju Jork për t’u bërë anëtari i parë republikan homoseksual i Kongresit, dyshohet se e ka shpikur historinë e tij të jetës, sipas New York Times, e cila gërmoi në të kaluarën e kongresmenit.
Santos e prezantoi veten si ‘mishërimi i plotë i ëndrrës amerikane’, një emigrant brazilian i brezit të dytë, ish-bankier i Wall Street-it dhe investitor i pasurive të paluajtshme.
Times bëri disa verifikime dhe arriti të gjente se ndërsa ai supozohej se studionte për financë në Kolegjin Baruch, të dhënat e gjykatës braziliane tregojnë se Santos po ndiqej penalisht për vjedhjen e librezës së çeqeve të një burri për të cilin kujdesej nëna e tij.
Citigroup dhe Goldman Sachs nuk mundën të gjenin asnjë të dhënë që Santos punonte për ta. Santos pretendoi gjithashtu se ishte një pronar që administronte 13 prona, por nuk ekzistojnë të dhëna për pronësinë e tij në New York City ose Long Island. Megjithatë, ai u dëbua dy herë nga apartamentet në Queens, në 2015 dhe 2017.
Santos punoi për Harbour City Capital, një kompani investimi e ngarkuar me drejtimin e një skeme Ponzi prej 17 milionë dollarësh, megjithëse ai këmbëngul se u largua përpara se të ngriheshin akuzat. Ndërsa ai renditi mbi 1 milion dollarë fitime dhe dividentë nga një kompani që ai themeloi, informacioni i pakët publik rreth firmës është kontradiktor.
Mbetet e paqartë pse Partia Demokratike nuk bëri kërkime bazë për Santos, një aleat i zëshëm i Trump që vuri në pikëpyetje vërtetësinë e rezultateve të zgjedhjeve të 2020 dhe që kundërshton të drejtat e abortit.
Fushata e Santos iu përgjigj akuzave të hënën, me avokatin e tij, Joseph Murray, duke thënë se ‘nuk ishte çudi që kongresmeni i zgjedhur Santos ka armiq te New York Times, të cilët po përpiqen të njollosin emrin e tij të mirë me këto akuza shpifëse’.
