Skocia është bërë vendi i parë i Mbretërisë së Bashkuar që miraton një sistem vetëidentifikimi për njerëzit që duan të ndryshojnë gjininë e tyre ligjore.
Parlamenti skocez mbështeti propozimet e diskutueshme me 86 vota pro, dhe 39 kundër.
Siç shkruan BBC, këto ndryshime u kundërshtuan nga disa deputetë të SNP-së, me një ministër të qeverisë që dha dorëheqjen në shenjë proteste në fillim të këtij viti.
Pati thirrje “turp për ju” nga protestuesit në galerinë publike pasi u shpall rezultati.
Qeveria e Mbretërisë së Bashkuar ka thënë tashmë se ka “shqetësime” në lidhje me legjislacionin dhe mund të kërkojë të parandalojë që ai të bëhet ligj duke bllokuar miratimin mbretëror.
Njerëzit në Skoci në fakt kanë qenë në gjendje të ndryshojnë gjininë e tyre ligjore nga mashkull në femër ose femër në mashkull që nga viti 2005.
Qeveria skoceze beson se procesi ekzistues mund të jetë ndërhyrës dhe shqetësues dhe i shtyn njerëzit të aplikojnë për një Certifikatë Njohje Gjinore (GRC).
Rregullat e reja, të cilat pritet të hyjnë në fuqi diku vitin e ardhshëm, do të ulin moshën minimale që njerëzit mund të aplikojnë për një ndryshim të gjinisë, nga 18 në 16 vjeç. Po ashtu do të hiqet kërkesa për një diagnozë mjekësore të disforisë gjinore.
Dhe aplikantëve tani do t’u duhet vetëm të kenë jetuar në gjininë e tyre të re për vetëm tre muaj – ose gjashtë muaj nëse janë 16 dhe 17 vjeç.
Do të ketë gjithashtu një “periudhë reflektimi” tre-mujore gjatë së cilës ata mund të ndryshojnë mendje dhe do të jetë një vepër penale të bësh një deklaratë të rreme ose aplikim të rremë për një ndryshim gjinie, ku kushdo që e bën këtë mund të përballet deri në dy vjet në burg.
Por de-tranzicioni do të jetë i mundur duke kaluar përsëri procesin.
Aktivistët thonë se një lëvizje për ta bërë më të lehtë jetën e njerëzve trans është vonuar prej kohësh, me grupet LGBT që nxorën së fundmi një letër të përbashkët duke thënë se reformat ishin një “mundësi historike për të vazhduar udhëtimin e Skocisë drejt barazisë së plotë shoqërore dhe ligjore”.
Duke folur përpara votimit, Sekretarja e Drejtësisë Sociale, Shona Robison tha: “Të drejtat trans nuk janë në konkurrencë me të drejtat e grave dhe si shpesh më parë, ne mund t’i përmirësojmë gjërat për të gjithë kur ata që diskriminohen veprojnë si aleatë, jo si kundërshtarë.”
