Administrata Amerikane e Zbatimit të Drogës (DEA) kapi më shumë se 379 milionë doza vdekjeprurëse të fentanilit në vitin 2022, të mjaftueshme për të vrarë çdo person në SHBA. Sipas të dhënave të qeverisë, opioidet sintetike si fentanili po vrasin aktualisht mbi 70,000 amerikanë në vit.
Në një deklaratë për shtyp, agjencia njoftoi se kishte sekuestruar 50.6 milionë pilula me fentanil, një numër rekord për DEA-n. Më shumë se 10,000 paund (4,535 kilogramë) pluhur fentanil u kapën gjithashtu, me ngarkesën totale që shkon deri në mbi 379 milionë doza vdekjeprurëse, mëse se e mjaftueshme për të vrarë 331 milionë burra, gra dhe fëmijë në SHBA.
Fentanyl është një opioid i prodhuar nga njeriu që është rreth 50 herë më i fuqishëm se heroina. Dy miligramë të substancës konsiderohen si një dozë vdekjeprurëse, duke e bërë të lehtë për trafikantët të kontrabandojnë sasi potencialisht fitimprurëse të drogës përtej kufijve të SHBA-së, shpesh të maskuara si pilula farmaceutike.
Dy kartele meksikane të krimit, Sinaloa e Jalisco janë ‘kryesisht përgjegjëse për fentanilin që po vret sot amerikanët’, tha në një deklaratë administratorja e DEA-s, Anne Milgram. Milgram shpjegoi se kartelet e prodhojnë në masë drogën në Meksikë, duke përdorur kimikate me burim kryesisht nga Kina.
Republikanët kanë fajësuar vazhdimisht zbutjen e sigurisë kufitare nga administrata Biden për rritjen e vdekjeve nga fentanili në SHBA. Një rekord prej 108,000 personash vdiqën nga mbidoza e drogës në SHBA në 12 muajt deri në mars 2022, nga niveli më i lartë i mëparshëm prej 98,000 në mars 2021. Rreth 72,000 nga këto vdekje u shkaktuan nga opioidet sintetike si fentanili, sipas shifrave nga Qendrat për Kontrollin dhe Parandalimin e Sëmundjeve.
