Alarmi për bombë në aeroportin e Prishtinës rezultoi i rremë.
Kështu ka njoftuar Policia e Kosovës, që tha se kërcënimi për bombë në Aeroportin Ndërkombëtar të Prishtinës “Adem Jashari”, ishte alarm i rremë “me qëllime të caktuara”.
Sipas Policisë, në objekt janë kryer kontrolle dhe se s’është gjetur asgjë.
“Pas realizimit të kontrollit në objekte dhe hapësira të Aeroportit Ndërkombëtar ‘Adem Jashari’ në Prishtinë, ka rezultuar se nuk ka ndonjë mjet shpërthyes, dhe se kanosja me mjete shpërthyese ka qenë një alarm i rremë me qëllime të caktuara. Pas përfundimit të kontrollit dhe punëve nga institucionet relevante, funksionimi dhe qarkullimi në aeroport i është kthyer normalitetit, andaj i falënderojmë qytetarët për mirëkuptimin dhe bashkëpunimin e treguar me institucionet e Republikës së Kosovës.”- ka njoftuar Policia.
Alarmi u ngrit më herët nga zëdhënësja e Aeroportit, Valentina Gara e cila ka bërë të ditur se udhëtarët dhe personeli janë evakuuar dhe janë të sigurt.
“Konfirmojmë se kemi pranuar një kërcenim me bombë. Udhëtarët dhe personeli janë evakuuar dhe janë të sigurt. Ekipet e involvuara në planin emergjent janë duke kryer detyrat e tyre.”- shkruante ajo në rrjetet sociale.
