Presidenti i SHBA-së Joe Biden ka nënshkruar një projektligj masiv shpenzimesh prej 1.7 trilion dollarësh. Përveç financimit të agjencive federale, legjislacioni përmban masa që ndalojnë TikTok në pajisjet qeveritare dhe rreth 45 miliardë dollarë ndihmë për Ukrainën.
Biden e njoftoi masën në një postim në mediat sociale të enjten mbrëma ndërsa ishte ende me pushime në Ishujt e Virgjër, duke thënë se projektligji do mbyllte një ‘vit përparimi historik’.
“Do të investojmë në kërkimin mjekësor, sigurinë, kujdesin shëndetësor, rimëkëmbjen nga fatkeqësitë, financimin për ndihmën e grave të dhunuara dhe do ketë një ndihmë thelbësore për Ukrainën,” tha ai.
Projektligji parashikon 773 miliardë dollarë për shpenzime diskrecionale jombrojtëse, 6% më e lartë krahasuar me vitin e kaluar dhe 858 miliardë dollarë për ushtrinë, ose një rritje prej 76 miliardë dollarësh krahasuar me vitin 2021.
45 miliardë dollarë të tjerë do shkojnë për Ukrainën, duke përfshirë 9 miliardë dollarë për stërvitjen dhe pajisjen e forcave të armatosura të vendit, 13 miliardë dollarë ndihmë ekonomike, 4 miliardë dollarë për përpjekjet për ndihmën ndaj refugjatëve dhe 300 milionë dollarë për policinë lokale dhe rojet kufitare.
Për më tepër, 687 milionë dollarë do të ndihmojnë në rimbushjen e stoqeve të armatimeve të SHBA-së.
