Ministrja e Mbrojtjes e Gjermanisë, Christine Lambrecht, është kritikuar ashpër pasi publikoi një urim për Vitin e Ri, në të cilin ajo preku konfliktin e vazhdueshëm në Ukrainë në sfondin e fishekzjarreve festive në Berlin.
Mesazhi u kritikua gjerësisht si ‘turp’ dhe bëri që politikanët e opozitës dhe disa gazetarë të bënin thirrje për dorëheqjen e saj.
Në një video të publikuar në faqen e saj personale në Instagram të shtunën mbrëma, Lambrecht mund të shihet duke qëndruar në mes të një rruge të Berlinit, me fishekzjarre që shpërthejnë pas saj.
“Një luftë po zhvillohet në mes të Evropës”, thotë ministrja në një çast, pa përmendur as Rusinë apo Ukrainën. Lambrecht më pas vijon duke thënë se gjatë vitit të kaluar ajo ka pasur ‘shumë takime me njerëz interesantë e të mëdhenj’ dhe ka marrë ‘shumë përshtypje të veçanta’ në lidhje me konfliktin e vazhdueshëm.
Një anëtar i Komitetit të Mbrojtjes të Bundestagut, Serap Guler, e quajti mesazhin e ministres një ‘turp’ që vetëm sa shtoi një grumbull gabimesh të supozuara të mëparshme.
“Çdo minutë shtesë, kancelari Olaf Scholz ende mban këtë ministre dhe dëmton më tej reputacionin e vendit tone.” – tha ligjvënësi nga Unioni Kristian Demokrat Konservator CDU, partia më e madhe opozitare e Gjermanisë.
Nuk ka të bëjë vetëm me imazhin e vetë ministres, por me perceptimin e Gjermanisë në Evropë dhe në mbarë botën, paralajmëroi Guler, duke pyetur veten ‘kush duhet të na marrë më seriozisht?’
Fjalëve të saj iu bë jehonë nga një tjetër deputet i CDU-së, Roderich Kieseëetter, i cili e quajti mesazhin e Lambrecht ‘të papërshtatshëm’ në një intervistë me të përditshmen Tagesspiegel.
“Kjo forcon mosbesimin ndaj Gjermanisë që për fat të keq po pushton Evropën dhe botën.” – tha ai.
Qeveria ka kundërshtuar të komentojë gjendjen, me zv.zëdhënësen e qeverisë Christiane Hoffmann duke u thënë gazetarëve: “Unë nuk shoh ndonjë arsye për ta vlerësuar këtë tani.”
