Një armëpushim i shpallur gjatë fundjavës nga presidenti kolumbian Gustavo Petro është një propozim për t’u diskutuar në negociatat e paqes dhe nuk është në fuqi, tha të martën grupi rebel i Ushtrisë Çlirimtare Kombëtare (ELN).
Petro, vetë një ish-guerril, është zotuar t’i japë fund konfliktit të brendshëm gjashtë dekadash të vendit, i cili ka lënë të paktën 450,000 të vdekur. Qeveria e tij mbajti një raund të parë të bisedimeve të paqes me ELN në dhjetor.
Gjatë fundjavës, Petro tha se Kolumbia do mbajë një armëpushim gjashtëmujor me ELN dhe katër grupe të tjera të armatosura.
“Delegacioni i negociatave i ELN-së nuk ka diskutuar me qeverinë e Gustavo Petro-s asnjë propozim për një armëpushim dypalësh, kështu që nuk ekziston asnjë marrëveshje për këtë çështje”, tha ELN në një deklaratë të postuar në faqen e saj të internetit.
Takimi i dhjetorit në Karakas, Venezuelë, mbuloi vetëm nisjen e bisedimeve dhe planin, tha ELN, duke shtuar se cikli i ardhshëm në Meksikë është caktuar gjithashtu për të mbuluar planin e bisedimeve.
“Pasi të përfundojmë atë çështje parashikohet se do jemi të gatshëm për të diskutuar propozimin dypalësh të armëpushimit, për të shqyrtuar kushtet për të bërë të mundur një marrëveshje”, shtuan rebelët.
Zyra e Petros tha se nuk kishte asnjë koment të menjëhershëm, por se presidenti do takohej me komisionerin e lartë të paqes të qeverisë dhe zyrtarë në ministritë e Brendshme dhe të Mbrojtjes.
Qeveria tha gjatë fundjavës se do nxirrte një dekret për çdo grup të armatosur me kushte specifike për armëpushimin dhe se armëpushimi do verifikohej ndër të tjera nga Kombet e Bashkuara, shkruan Reuters.
Përpjekjet e mëparshme për negociata me ELN, e cila ka rreth 2,400 luftëtarë dhe u themelua në vitin 1964 nga priftërinjtë radikalë katolikë, nuk kanë pasur sukses pjesërisht për shkak të mospajtimit brenda radhëve të saj.
Udhëheqësit rebelë kanë thënë se grupi është i bashkuar, por është e paqartë se sa ndikim kanë negociatorët mbi njësitë aktive. Pjesa më e madhe e ekipit negociator të ELN-së është më e vjetër se shumë prej anëtarëve të saj.
