Policia ka arrestuar në Shkodër një 32-vjeçare pasi dyshohet se mbrëmjen e djeshme kishte braktisur foshnjën e saj të porsalindur duke e lënë në anë të lumit Kir.
Policia ka gjetur trupin e pajetë të foshnjës në vendin e quajtur “Postribë” në anë të lumit Kir.
Foshnja e seksit mashkull kishte lindur më 30 dhjetor 2022.
Autoritetet arrestuan 32-vjeçaren Orjana Gremi banuese në fshatin Myselim.
“Hodhi në lumin Kir foshnjën e saj, vihet në pranga për vrasje, 32-vjeçarja.
Strukturat Hetimore të Drejtorisë Vendore të Policisë Shkodër, bazuar në inteligjencën informative, se mbrëmjen e djeshme, një shtetase dyshohet se kishte braktisur foshnjën e saj, të seksit mashkull, të lindur më datë 30 dhjetor 2022, dhe mund ta hidhte në lumin Kir, kanë organizuar punën për verifikimin e këtij informacioni të marrë.
Si rezultat i kontrolleve të ushtruara nga shërbimet e Policisë, gjatë mbrëmjes së djeshme dhe orëve të para të mëngjesit të sotëm, në vendin e quajtur Postribë, në lumin Kir, u gjet i pajetë, trupi i foshnjës së 32-vjeçares e cila e kishte hedhur atë në lumë gjatë natës.
Shërbimet e Policisë kanë shoqëruar në ambientet e Drejtorisë Vendore të Policisë Shkodër, shtetasen O. G., 32 vjeçe, banuese në fshatin Myselim.
Në përfundim të veprimeve të para hetimore, të kryera në bashkëpunim me Prokurorinë pranë Gjykatës së Rrethit Gjyqësor Shkodër, u bë arrestimi në flagrancë i kësaj shtetaseje, për veprën penale “Vrasja me dashje”.
Materialet procedurale i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme”-njofton policia.
