Sanksionet perëndimore ndaj burimeve energjetike ruse po shkaktojnë një ndryshim në rrjedhjet globale të naftës dhe gazit dhe po prishin lidhjet e gjata ekonomike në mbarë botën, ka raportuar Wall Street Journal.
Një embargo e BE-së ndaj naftës së papërpunuar ruse hyri në fuqi më 5 dhjetor, së bashku me një kufi prej 60 dollarësh për eksportet e naftës, si pjesë e paketës së gjashtë të sanksioneve të lidhura me Ukrainën, të vendosura ndaj Moskës. Më 5 shkurt do hyjë në fuqi ndalimi i importeve nga BE-ja të produkteve të naftës si nafta dhe vajguri me origjinë nga Rusia.
Kufizimet e shtynë Rusinë, dikur furnizuesi më i madh i Evropës, të ridrejtojë eksportet e saj të energjisë në Indi dhe Kinë, ku blerësit po përfitojnë nga zbritjet që ofron Moska. Që nga fundi i nëntorit, Rusia thuhet se ka shitur naftën e saj të parë Urals për 17 dollarë më pak se kufiri, raportoi WSJ, duke cituar Agjencinë Ndërkombëtare të Energjisë.
“Edhe nëse çmimet do rriteshin në 100 dollarë për fuçi, Kina e India mund të vazhdojnë të blejnë naftë ruse nëse kanë qasje për ta siguruar.” – tha kreu i kërkimit në kompaninë konsulente të naftës Energy Aspects, Amrita Sen.
Rusia rriti dërgesat e naftës në Kinë me 17% në nëntor nga një vit më parë në 7.81 milionë ton, totali më i lartë që nga gushti, duke kaluar Arabinë Saudite si furnizuesi kryesor i vendit.
Dërgesat e Moskës në Indi u rritën në 1.4 milionë fuçi në ditë në nëntor, krahasuar me vetëm 36,000 fuçi në ditë një vit më parë, sipas ofruesit të të dhënave të mallrave Kpler. Rafinerët indianë po përfitojnë nga shitja e produkteve të naftës të prodhuara nga nafta e përpunuar ruse, duke gëzuar një përjashtim të lejuar nga programi i sanksioneve të bllokut.
Ndërkohë Arabia Saudite, Emiratet e Bashkuara Arabe dhe eksportuesit e tjerë të mëdhenj të energjisë në Lindjen e Mesme kanë zhvendosur fokusin e tyre larg tregjeve tradicionale në Azi dhe po korrin përfitimet nga rritja e çmimeve të karburanteve fosile në Evropë.
Arabia Saudite ishte me rritjen më të shpejtë midis furnizuesve të tjerë të naftës në BE në tremujorin e tretë, me një pjesë tregu prej 9.1% të importeve të karburantit të bllokut, krahasuar me një mesatare prej 5.1% vitin e kaluar, sipas Eurostat.
