Ankaraja ka akuzuar Suedinë se nuk ka ndërmarrë hapat e nevojshëm kundër terrorizmit pasi një grup demonstruesish varën një figurë të presidentit turk Rexhep Tajip Erdogan në një urë pranë Bashkisë së Stokholmit. Të enjten, Ministria e Jashtme turke thirri ambasadorin e Suedisë për të shprehur zemërimin e saj.
Marifeti me sa duket u organizua nga Komiteti i Solidaritetit Rojava të Suedisë, një grup i lidhur me Partinë e Punëtorëve Kurdë (PKK), e cila është e ndaluar në Turqi si një organizatë ‘terroriste’.
“Historia tregon se si përfundojnë diktatorët.” – shkroi grupi në një postim në mediat sociale duke e krahasuar Erdoganin me diktatorin fashist të Italisë Benito Musolini, i cili u var me kokë poshtë pas ekzekutimit të tij afër fundit të Luftës së Dytë Botërore.
“U theksua pritshmëria jonë që autorët e incidentit të identifikohen, të kryhen proceset e nevojshme dhe Suedia të mbajë premtimet e saj.” – tha një burim diplomatik turk për Reuters.
Fahrettin Altun, drejtori i komunikimit i presidencës turke, tha gjithashtu se incidenti ishte një shenjë se Suedia nuk është angazhuar plotësisht për të luftuar terrorizmin.
Ministria e Punëve të Jashtme të Suedisë ka konfirmuar se ambasadori është thirrur në Ministrinë e Jashtme turke, por nuk ka dhënë asnjë hollësi se çfarë është diskutuar gjatë takimit.
