Kundërshtimi i Suedisë për të hetuar një ngjarje të organizuar nga kurdët, i cili pa një figurë të presidentit turk Rexhep Tajip Erdogan të varur në publik, përbën ‘mbështetje të terrorizmit’, ka thënë Partia AK në pushtet e Turqisë.
Incidenti ka tensionuar më tej marrëdhëniet midis Turqisë e Suedisë, të cilat mbeten të bllokuara lidhur me ofertën e vendit skandinav për t’u bashkuar me NATO-n.
Të mërkurën, një figurë me përmasat që përshkruanin Erdoganin u var me kokë poshtë gjatë një mitingu kurd në qendër të Stokholmit.
Grupi që qëndron pas protestës, Komiteti Rojava i Suedisë, postoi një video të marifetit në mediat sociale, duke i kërkuar liderit turk të jepte dorëheqjen nëse nuk donte të përballej me fatin e diktatorit italian Benito Mussolini, i cili u var në publik pas ekzekutimit të tij në 1945.
Turqia ka thirrur ambasadorin suedez në Ankara lidhur me incidentin dhe i ka kërkuar Stokholmit ‘të ndërmarrë hapat e nevojshëm kundër grupeve terroriste’. Megjithatë, një prokuror suedez kundërshtoi të nisë një hetim, duke argumentuar se demonstruesit kishin ushtruar të drejtën e tyre për lirinë e fjalës.
“Kundërshtimi për të ndjekur penalisht do të thotë se ‘një grup terrorist mund të ndërmarrë çdo veprim që dëshiron në Suedi, mund të kërcënojë krerët e shteteve të vendeve mike”, u tha gazetarëve të hënën zëdhënësi i AK Partisë së Erdoganit, Omer Celik.
Ajo që bënë protestuesit kurdë ‘nuk ka të bëjë me fjalën e lirë’, këmbënguli ai, duke shtuar se Suedia është bërë ‘qendra e propagandës së këtyre terroristëve’.
“Heshtja e atyre që pretendojnë se mbrojnë demokracinë, pluralizmin dhe lirinë përballë këtij akti të poshtër terrorist nuk do të thotë gjë tjetër veçse mbështetje për terrorizmin.” – pohoi Celik, cituar nga agjencia e lajmeve Anadolu.
Ankaraja aktualisht ka bllokuar kërkesën e Suedisë dhe Finlandës për t’u bashkuar me NATO-n, duke i akuzuar se strehojnë ‘terroristë’ nga Partia e Punëtorëve të Kurdistanit (PKK) dhe grupe të tjera të lidhura me to, të cilat janë ndaluar nga autoritetet turke dhe duke kërkuar heqjen e një embargoje armësh ndaj Turqisë.
Që atëherë, Suedia ka hequr ndalimin e shitjes së armëve, ka ndryshuar Kushtetutën e saj për ta bërë më të lehtë shtypjen e terrorizmit dhe ka kryer disa ekstradime të të dyshuarve kurdë në Turqi.
Por Ankaraja këmbënguli se këto hapa nuk ishin të mjaftueshëm. Të dielën, Erdogan u tha Suedisë dhe Finlandës se ‘para së gjithash, ju duhet të na dorëzoni më shumë se 100 prej këtyre terroristëve’.
