Të paktën 145 persona janë zhdukur dhe dyshohet se kanë vdekur pasi një varkë me motor e mbingarkuar me mallra dhe kafshë u mbyt natën në një lumë në veriperëndim të Kongos, thanë autoritetet të enjten.
Rreth 55 persona i mbijetuan katastrofës, thanë zyrtarët. Varka po udhëtonte për në Republikën fqinje të Kongos kur u përmbys në lumin Lulonga, pranë qytetit të Basankusu.
Jean-Pierre Wangela, president i grupeve të shoqërisë civile në zonë, u tha gazetarëve se të paktën 145 persona ishin të zhdukur. Ai fajësoi mbingarkesën për përmbytjen e varkës, por tha se vendasit kanë pak mundësi të tjera lëvizjeje, shkruan AP.
“Nuk ka asnjë mjet tjetër transporti aktualisht në provincën tonë dhe këtu në territorin e Basankusu,” tha ai.
Fundosjet e varkave që shkaktojnë dhjetëra viktima janë shumë të zakonshme në pjesët e largëta të Kongos, ku udhëtimi me rrugë është ndonjëherë i pamundur. Shumë mjete ujore janë të mbingarkuara me mallra dhe njerëz që nuk dinë të notojnë. Operacionet e shpëtimit janë jashtëzakonisht të kufizuara në pjesë të largëta të vendit.
Në tetor, më shumë se 40 njerëz vdiqën në lumin Kongo në provincën Equateur në rrethana të ngjashme.
