Aktori Alec Baldwin dhe një specialiste e armëve do akuzohen për vrasje të pavullnetshme në ngjarjen fatale ku një kineaste u vra në sheshin e xhirimit në New Mexico, njoftuan prokurorët të enjten, duke përmendur një ‘mospërfillje kriminale për sigurinë’.
Prokurorja e qarkut në Santa Fe, Mary Carmack-Altëies, lëshoi një deklaratë duke njoftuar akuzat kundër Baldwin dhe Hannah Gutierrez Reed, të cilët mbikëqyrnin armët në setin e filmit ‘Rust’.
Halyna Hutchins vdiq pak pasi u plagos gjatë provave në një fermë në periferi të Santa Fe më 21 tetor 2021. Baldwin po i drejtonte një pistoletë Hutchins kur arma shpërtheu, duke e vrarë atë dhe duke plagosur drejtorin, Joel Souza.
Ndihmësdrejtori David Halls, i cili i dorëzoi Baldëin armën, ka nënshkruar një marrëveshje për të pranuar fajësinë për përdorim të pakujdesshëm të një arme vdekjeprurëse, tha zyra e prokurorit të qarkut.
Vrasja e pavullnetshme mund të përfshijë një vrasje që ndodh ndërsa i pandehuri po bën diçka që është e ligjshme, por e rrezikshme dhe po vepron pa kujdes.
Akuza është një krim i shkallës së katërt, i dënueshëm deri në 18 muaj burg dhe 5000 dollarë gjobë sipas ligjit të New Mexico. Akuzat përfshijnë gjithashtu një dispozitë që mund të rezultojë me pesë vjet burg të detyrueshëm për shkak se vepra është kryer me armë.
