Turqia mund të largohet nga NATO brenda disa muajsh, ka pohuar një politikan atje, duke përmendur ‘provokimet’ nga blloku ushtarak kundër kombit të tij.
Ethem Sancak është një biznesmen turk me origjinë arabe i cili është aktiv në politikë dhe të cilin mediat lokale e përshkruajnë si të afërt me presidentin Rexhep Tajip Erdogan.
Ai po komentonte një fushatë anti-NATO në Turqi që ka organizuar Partia Vatan (Patriotike), ku ai mban postin e zëvendëskryetarit për marrëdhëniet me jashtë.
“NATO na detyron të ndërmarrim këto veprime me provokimet e tyre,” tha ai, duke parashikuar se qëllimi i partisë së tij për ta bërë Turqinë të largohet nga aleanca mund të realizohet ‘në pesë deri në gjashtë muaj’.
Duke folur për faqen e lajmeve enbursa.com të martën, Sancak vuri në dukje se të qenit pjesë e bllokut e vendos Turqinë në një kurs përplasjeje me Greqinë dhe gjithashtu në rrezik për t’u tërhequr ‘në një vorbull në Lindjen e Mesme’. Ngjarjet e fundit të djegies së Kuranit në disa vende evropiane e bëjnë largimin nga NATO ‘një domosdoshmëri’, argumentoi ai.
Politikani dhe aktivisti danezo-suedez i krahut të djathtë Rasmus Paludan organizoi një protestë fundjavën e kaluar përpara ambasadës turke në Stokholm, e cila përfshinte djegien e librit të shenjtë të Islamit.
Incidenti shkaktoi zemërim në botën myslimane, ndërsa presidenti turk tha se zgjedhja e Stokholmit për të lejuar veprimin nënkuptonte se Ankaraja nuk do mbështeste kërkesën e Suedisë për t’u bashkuar me NATO-n.
Omer Celik, zëdhënësi i Partisë për Drejtësi dhe Zhvillim (AKP) në pushtet, e hodhi poshtë idenë, të cilën ai e quajti të një ‘mendjeje të marrë’. Turqia është ndër anëtarët më të vjetër të NATO-s dhe njerëzit që bëjnë thirrje për daljen e saj po ‘flasin për shkatërrimin’ e bllokut, u tha ai gazetarëve të mërkurën.
Sancak iu bashkua Partisë Vatan vitin e kaluar. Interesat e tij të biznesit përfshijnë farmaceutikë dhe kozmetikë si dhe media, me kanalin televiziv 360 dhe gazetën e përditshme Star ndër blerjet e tij më të njohura.
