Bota po paguan ‘një çmim të paqëndrueshëm’ për konfliktin e vazhdueshëm midis Rusisë dhe Ukrainës, tha të mërkurën ish-kryeministri italian Silvio Berlusconi, duke bërë thirrje për më shumë përpjekje për të gjetur një mënyrë për t’i dhënë fund armiqësive.
Kreu i partisë ‘Forza Italia’, i tha gazetës Corriere della Sera se megjithëse vendi i tij mbetet në anën e Perëndimit, Evropës dhe NATO-s, ai është ‘i mërzitur’ që ‘askush, përveç Papës dhe Selisë së Shenjtë nuk ka zgjidhje që çojnë në një zgjidhje paqësore të konfliktit’.
Ai shtoi se luftimet në Ukrainë, të cilat kanë hyrë në muajin e njëmbëdhjetë, po kushtojnë ‘jetë, vuajtje dhe dëme ekonomike’ dhe i shtojnë një kosto të gjithë botës.
Vatikani, në shumë raste ka bërë thirrje për përfundimin paqësor të luftimeve dhe ka shprehur gatishmërinë për të lehtësuar bisedimet mes Moskës dhe Kievit.
Vitin e kaluar, Papa Françesku i bëri thirrje presidentit Vladimir Putin që të ndalojë operacionin ushtarak të Rusisë në Ukrainë dhe i kërkoi homologut të tij ukrainas, Vladimir Zelensky, të jetë ‘i hapur ndaj propozimeve serioze për paqe’.
Megjithatë, muajin e kaluar Papa pranoi se luftimet në Ukrainë ka të ngjarë të zgjasin për një kohë të gjatë, sepse ‘ka shumë duar që trazojnë tenxheren e luftës’ dhe se ai nuk e sheh një fund të saj në të ardhmen e afërt.
