Gazetarët dhe aktivistët e të drejtave të njeriut njoftuan se kanë paraqitur një ankesë kushtetuese kundër praktikave globale të vëzhgimit të shërbimit të inteligjencës së jashtme gjermane, BND.
“Duhet të ndalet mbikëqyrja masive dhe zgjerimi i pakufizuar i kompetencave të shërbimeve të inteligjencës. Deri më tani, ligjvënësit gjermanë kanë dështuar ta bëjnë këtë”, tha Christian Mihr, drejtor i Reporterëve pa Kufij (RSF) në Gjermani.
“Nën maskën e mbledhjes së informacionit strategjik jashtë vendit, BND tani mund të përdorë mjete të gjera mbikëqyrjeje, mjete që janë të përshtatura për individët, siç është softueri shtetëror, pa ndonjë kufizim të rëndësishëm ligjor,” tha Bijan Moini nga shoqëria me qendër në Berlin ‘Të Drejtat Civile’ (GFF).
Akti i Shërbimit Federal të Inteligjencës së Gjermanisë, i cili i dha kompetenca të gjera BND-së, u shpall pjesërisht jokushtetues nga gjykata më e lartë e vendit në vitin 2020 pasi RSF paraqiti një ankesë kushtetuese.
Pavarësisht një rishikimi të ligjit në pranverën e vitit 2021, ekspertët theksojnë se gazetarët dhe qytetarët jo-BE janë të mbrojtur në mënyrë të pamjaftueshme nga mbikëqyrja masive e komunikimeve globale nga BND.
Sipas ekspertëve, ndërsa dispozitat ligjore po mbrojnë qytetarët gjermanë nga mbikëqyrja globale, të dhënat e tyre mund të mblidhen gjithashtu nga BND, pasi ligji i jep agjencisë fuqinë për të gjurmuar komunikimin.
