Belgjika nuk do e mbështesë një ndalim të importit të diamanteve ruse në Bashkimin Evropian, tha të premten kryeministri Alexander De Croo, duke shtuar se masat e këtij lloji do ishin efektive vetëm nëse do të futeshin globalisht.
BE-ja po punon për raundin e saj të dhjetë të sanksioneve ndaj Rusisë lidhur me sulmin ushtarak të Moskës ndaj Ukrainës. Polonia dhe vendet baltike po shtyjnë të ndalojnë diamantet ruse nga tregu i bllokut, si dhe masa të tjera si ndërprerja e më shumë bankave nga sistemi i pagesave SWIFT dhe kufizimet në bashkëpunimin në energjinë bërthamore.
“Ne nuk e mbështesim ndalimin e furnizimit me diamante.” – u tha De Croo gazetarëve kur u pyet për embargon e propozuar.
De Croo tha se vëllimi i furnizimit me diamant rusë në Belgjikë kishte rënë 80% që nga vendosja e sanksioneve të lidhura me Ukrainën, por theksoi se eksportet ruse të gurëve të çmuar në tërësi nuk kishin rënë.
“Hapat e këtij lloji duhet të ndërmerren vetëm në nivel global. Është e nevojshme të krijohet një sistem për gjurmimin e origjinës së diamanteve për t’i bërë sanksionet vërtet efektive. Përndryshe, diamantet do e gjejnë rrugën e tyre në treg.” – tha kryeministri.
Në tetor, vendet anëtare të BE-së diskutuan një ndalim të importeve nga gjiganti rus i minierave Alrosa, si pjesë e paketës së tetë të sanksioneve. Megjithatë, miniera e gurëve të çmuar qëndroi jashtë listës përfundimtare që përfshin 29 individë dhe shtatë persona juridikë.
Kthesa ka ardhur pasi Belgjika, shtëpia e qendrës më të madhe të tregtimit të diamanteve në botë në Antëerp, bllokoi embargon e BE-së, duke paralajmëruar se masa mund të kushtojë mijëra vende pune në qytet.
Sipas statistikave zyrtare belge, vendi importoi ende 676 milionë euro (734 milionë dollarë) diamante ruse në tremujorin e dytë të 2022, të cilat më pas ranë në 154 milionë euro (167 milionë dollarë) në tre muajt deri në fund të shtatorit.
Alrosa, prodhuesi më i madh në botë i diamanteve me 30% të tregut global, është vendosur në listën e sanksioneve të SHBA-së. Autoritetet belge thuhet se janë të shqetësuara për humbjen e biznesit ndaj qendrave të tregtimit të diamanteve në Indi dhe Emiratet e Bashkuara Arabe.
