Katër persona që kishin ngelur në det të hapur pas një defekti në motorin e mjetit lundrues janë shpëtuar nga Policia Kufitare e Vlorës.
Ata ishin bllokuar në vendin e quajtur ‘Shën Vasil’ pas problemeve në motor.
Pas njoftimit për ndihmë Policia Kufitare e rimorkoi mjetin me defekt dhe katër personat që ndodheshin në të duke i nxjerrë në breg. Sipas policisë, gjendja shëndetësore e personave në fjalë është e mirë.
Njoftimi
“Policia Kufitare e Vlorës iu vjen në ndihmë 4 shtetasve që kishin ngelur në det dhe e kishin të pamundur kthimin në breg, me mjetin e tyre lundrues që kishte pësuar defekt. Paraditen e sotme, salla operative e Policisë Kufitare Vlorë ka marrë njoftim për 4 shtetas që ishin duke lundruar në det, me një mjet turistik skaf, në vendin e quajtur “Shën Vasil” dhe e kishin të pamundur të ktheheshin në breg, pasi mjeti lundrues kishte pësuar defekt. Menjëherë pas marrjes së njoftimit janë organizuar shërbimet e Policisë Kufitare, për t’iu ardhur në ndihmë 4 shtetasve, me një mjet tjetër lundrues. Shërbimet e Policisë i kanë nxjerrë ata në breg, duke i shoqëruar me mjetin e Policisë Kufitare. Të katërt shtetasit aktualisht janë në gjendje të mirë shëndetësore. Policia e Kufitare e Vlorës është e angazhuar maksimalisht në shërbim të qytetarëve dhe të vizitorëve, për të krijuar një ambient sa më të sigurt.”
