Departamenti i Policisë së Memfisit ka shpërndarë një njësi të diskutueshme, oficerët e së cilës rrahën për vdekje 29-vjeçarin Tire Nichols në fillim të këtij muaji. Vrasja e supozuar e Nichols shkaktoi një valë protestash në qytet.
“Është në interesin më të mirë të të gjithëve që të çaktivizohet përgjithmonë njësia Scorpion”, tha drejtoresha e policisë Cerelyn Davis në një deklaratë të shtunën. Davis shtoi se oficerët e njësisë e pranuën ‘pa rezerva’ vendimin.
Njoftimi i Davis erdhi një ditë pasi qyteti i Memphis publikoi pamjet e kamerave të trupit që tregonin vdekjen e Nichols. Pesë oficerë mund të shihen duke e goditur me grushte dhe shkelma burrin, si dhe duke e spërkatur me piper e duke e goditur me shkopinj.
Nichols u përpoq të ikte pasi u tërhoq zvarrë nga automjeti i tij në një ndalesë trafiku. Pasi trupi i tij i palëvizshëm u prangos dhe u mbështet në një makinë, oficerët shihen duke uruar njëri-tjetrin.
Nichols vdiq në një spital tre ditë pas incidentit, dhe oficerët e përfshirë janë shkarkuar dhe akuzuar për vrasje të shkallës së dytë, sulm të rëndë, rrëmbim e sjellje të pahijshme. Të pesë oficerët dhe Nichols janë me ngjyrë.
Një hetim i brendshëm zbuloi se oficerët ‘shkelën politika të shumta të departamentit, duke përfshirë përdorimin e tepruar të forcës, detyrën për të ndërhyrë dhe detyrën për të ofruar ndihmë,’ tha Davis në një deklaratë javën e kaluar.
‘Njësia Scorpion’ u formua në nëntor 2021. Afërsisht 40 oficerët e saj u ngarkuan të patrullonin ‘pikat e nxehta të krimit të lartë’ në qytet, me një fokus të veçantë në bandat dhe krimet e lidhura me drogën.
Memphis ka një nga nivelet më të larta të krimit në SHBA, dhe rregullisht kryeson listat e qyteteve më të rrezikshme të vendit.
‘Njësia Scorpion’ bëri më shumë se 550 arrestime në dy muajt e parë të funksionimit, 390 prej tyre për vepra penale.
Oficerët e saj konfiskuan më shumë se 250 armë dhe mbi 100,000 dollarë para të paligjshme në atë periudhë, deklaroi kryetari i bashkisë së Memphisit Jim Strickland në një fjalim janarin e kaluar.
Megjithatë, akuzat për brutalitet e ndoqën njësinë që në fillim, me një avokat të familjes Nichlols që u tha gazetarëve të premten se ai kishte përpiluar dëshmi nga shumë njerëz që pretendonin se kishin pësuar lëndime fizike në duart e oficerëve të njësisë.
