Ish-presidenti amerikan Donald Trump ngriti një padi prej gati 50 milionë dollarësh kundër gazetarit dhe autorit Bob Woodward të hënën, duke e akuzuar atë për përfshirjen pa leje të intervistave të regjistruara në një libër audio të kohëve të fundit
Në ankesë, Trump akuzon Woodward-in për ‘uzurpim, manipulim dhe shfrytëzim sistematik’ të regjistrimeve, të cilat ai thotë se ishin ‘të mbrojtura’ nga ligjet për të drejtën e autorit dhe licencës.
Shtëpia botuese Simon & Schuster dhe kompania e saj mëmë, Paramount, janë të listuar si bashkë të pandehur.
Woodward regjistroi një seri intervistash telefonike me Trump gjatë kohës së tij në detyrë. Bisedat formuan bazën e librit ‘Rage’, i botuar në shtator 2020. Gazetari më pas ripërdori regjistrimet për librin audio të titulluar ‘Kasetat e Trump: Njëzet Intervistat e Bob Woodward me Presidentin Donald Trump’, të publikuar tetorin e kaluar. Ai përmban më shumë se tetë orë intervista të papërpunuara të Woodward të kryera me Trump midis 2016 dhe 2020, si dhe komentet e autorit.
Trump pretendon se ai kishte pranuar të intervistohej për librin, por jo për audiolibrin pasues.
“Përballë realitetit se Rage ishte një dështim i plotë dhe total, Woodward vendosi të shfrytëzojë, uzurpojë dhe kapitalizojë zërin e Presidentit Trump”, thuhet në padi.
Në një deklaratë të përbashkët për mediat, Woodward dhe Simon & Schuster hodhën poshtë akuzat. “Të gjitha këto intervista janë regjistruar me dijeninë dhe marrëveshjen e Presidentit Trump”, thuhet në deklaratë.
“Për më tepër, është në interesin e publikut që të kemi këtë rekord historik me fjalët e vetë Trump. Ne kemi besim se faktet dhe ligji janë në favorin tonë.”
Woodward u bë i njohur për herë të parë në vitin 1972, si një nga reporterët investigativë që për herë të parë shpërtheu historinë e asaj që më vonë u bë e njohur si skandali ‘Watergate’. Debati çoi në dorëheqjen e Presidentit Richard Nixon dy vjet më vonë.
Woodward ka fituar çmime të shumta dhe është autor ose bashkëautor i disa librave më të shitur politikë, duke përfshirë libra për presidentët bashkëkohorë të SHBA.
