Një protestë kundër reformave të pensioneve të qeverisë u shndërrua në dhunë në qytetin francez të Rennes të martën, pasi policia përdori gaz lotsjellës për të shpërndarë një grup prej rreth 200 demonstruesish që kishin ndërtuar barrikada dhe kishin goditur oficerët me fishekzjarre.
Dhjetëra mijëra njerëz morën pjesë gjithashtu në greva dhe protesta në të gjithë vendin.
Grevat dhe marshimet ishin një përsëritje e protestave të muajit të kaluar, ku rreth 1.2 milionë njerëz dolën në rrugët e qyteteve kryesore të Francës, sipas shifrave nga Ministria e Brendshme franceze. Demonstratat e fundit vijnë ndërsa parlamenti debaton projektligjin e propozuar të reformës së pensioneve nga presidenti Emmanuel Macron, që do rriste moshën e pensionit nga 62 në 64 vjeç.
Në qytetin veriperëndimor të Rennes, ‘rreth 200 individë’ kundërshtuan të shpërndaheshin pas përfundimit të një tubimi të planifikuar dhe filluan të përballeshin me oficerët e policisë, thanë zyrtarët e qytetit për TF1. Autoritetet e qytetit u kërkuan demonstruesve të largoheshin nga skena dhe ‘të shkëputeshin nga ngatërrestarët’, por grupi ngriti barrikada të cilave më pas u vuri flakën.
Ndërsa protestuesit hodhën fishekzjarre ndaj policisë, oficerët u përgjigjën me gaz lotsjellës. Një makinë ujëhedhëse u përdor mbi turmën, raportoi TF1.
Rreth 13 persona u arrestuan dhe një polic u plagos, thanë zyrtarët e qytetit. Zjarret mund të shiheshin në të gjithë qytetin pasi grumbullimi më në fund u shpërnda, me tym që ngrihej në qiell pranë Katedrales së Shën Pierre në qendër të qytetit.
