Udhëheqësit e BE-së duan të parandalojnë emigrantët që të kërkojnë azil në një vend tjetër në bllok, nëse ata tashmë janë refuzuar në një vend tjetër. Por ata nuk janë dakord për ndërtimin e një muri në kufijtë e jashtëm të BE-së, sipas DW.
Presidentja e Komisionit Evropian Ursula von der Leyen tha herët të premten se liderët e BE ranë dakord për masa më të ashpra për të trajtuar “emigrimin e parregullt”.
“Ne do të veprojmë për të forcuar kufijtë tanë të jashtëm dhe për të parandaluar migrimin e parregullt,” tha von der Leyen pas samitit të BE-së të së enjtes.
Masa erdhi pasi disa vende të BE-së kërkuan rregulla më të rrepta për të frenuar numrin e lartë të kërkesave për azil për bllokun 27-anëtarësh
BE-ja pret miliona refugjatë që kishin ikur nga konfliktet në Ukrainë, Siri dhe Afganistan. Por blloku shpesh i konsideron kërkesat për azil nga shtetas të vendeve relativisht më të sigurta, si Bangladeshi, Turqia dhe Tunizia, si migrantë ekonomikë të papërshtatshëm për azil.
Von der Leyen tha se vendet e BE-së donin të njihnin vendimet e deportimit të njëri-tjetrit në një përpjekje për të rritur dëbimet e tilla
Ata ranë dakord për një “parim” për të parandaluar migrantët që të kërkojnë azil në një vend tjetër të BE-së pasi u refuzuan në fillim.
Udhëheqësit e BE ranë dakord për një sërë masash, duke përfshirë nisma për të forcuar infrastrukturën e mbrojtjes në kufijtë e jashtëm të BE-së.
Ata i bënë thirrje Komisionit “të mobilizojë menjëherë fonde të konsiderueshme të BE-së” për të përforcuar kufirin e jashtëm të bllokut me “aftësi dhe infrastrukturë mbrojtëse, mjete të mbikqyrjes, duke përfshirë mbikëqyrjen ajrore dhe pajisje”, sipas dokumentit të samitit.
Çështja e ndërtimit të mure në kufijtë e BE-së ka qenë një pikë e ndezur në bisedime, me von der Leyen që më parë tha se BE nuk do të paguante për mure të tilla
Përpara samitit të së enjtes, kancelari austriak Karl Nehammer bëri thirrje që BE të financojë gardhe në kufijtë me vendet fqinje të BE-së, si Turqia.
Kancelari gjerman Olaf Scholz tha se ishte e rëndësishme që anëtarët e BE-së të punojnë së bashku për migracionin, pavarësisht nëse “ka të bëjë me kontrollet në kufijtë e jashtëm, përmirësimin e infrastrukturës ose bashkëpunimin me vendet e origjinës dhe tranzitit”.
Xavier Bettel, kryeministri i Luksemburgut, kritikoi ashpër thirrjet për ndërtimin e gardheve të tilla.
“Do të ishte turp nëse në Evropë do të ndërtohej një mur me yjet evropiane”, tha ai, duke shtuar se për të, Evropa do të ishte “rënia e një muri”.
Kryediplomati i BE-së, Josep Borrell, tha se “Fortesa e Evropës” nuk ishte zgjidhja dhe bëri thirrje për t’u ofruar emigrantëve procese ligjore për të hyrë në BE.
“Njerëzit lëvizin sepse në vendet e tyre nuk ka të ardhme, nuk ka paqe, nuk ka stabilitet,” tha ai.
