Qarkullimi tregtar i Rusisë me Turqinë është zgjeruar me shpejtësi dhe ka arritur në 70 miliardë dollarë në vitin 2022, tha të premten për RIA Novosti konsulli i përgjithshëm rus në Stamboll, Andrey Buravov.
Sipas Buravov, në kuadrin e sanksioneve perëndimore kundër Moskës, perspektivat për ndërtimin e bashkëpunimit me vendet e interesuara për të janë rritur.
“Pa dyshim, Turqia është një prej tyre. Ne shohim rezultate konkrete të kësaj pune”, tha ai, duke nënvizuar se ‘gjatë vitit të kaluar, në fakt mund të flasim për dyfishimin e xhiros tonë tregtare, e cila iu afrua shifrës së 70 miliardë dollarëve. Në këtë drejtim, synimi i drejtuesve të vendeve tona për të sjellë marrëdhëniet tregtare dhe ekonomike në 100 miliardë dollarë po bëhet më i mundshëm’.
Sipas diplomatit, gjendja e tanishme gjeopolitike mundëson zgjerimin e marrëdhënieve tregtare dypalëshe si në aspektin e furnizimit me prodhime turke në Rusi në mes të tërheqjes së shumë kompanive perëndimore nga ai treg dhe anasjelltas. Procesi i zhvillimit të prodhimit të përbashkët dhe i realizimit të investimeve të përbashkëta tashmë është duke u zhvilluar, shtoi Buravov.
Vitin e kaluar, Turqia dhe Rusia nënshkruan një udhërrëfyes për bashkëpunimin ekonomik që parashikon të sjellë qarkullimin tregtar dypalësh në 100 miliardë dollarë në vit. Të dy vendet kanë rënë dakord gjithashtu të prezantojnë rublën ruse si një monedhë shlyerjeje për tregtinë dypalëshe, duke përfshirë furnizimet me gaz natyror rus.
Të dhënat tregojnë se verën e kaluar Turqia u bë një nga pesë eksportuesit kryesorë në Rusi. Në vitin 2021, ajo u rendit e 11-ta në mesin e vendeve eksportuese atje, përpara SHBA-së, Francës, Japonisë, Polonisë dhe Italisë.
