Kina po synon të rrisë numrin e kokave të saj bërthamore në 900 deri në vitin 2035 si një masë kundër SHBA-së, thanë burimet kineze për agjencinë e lajmeve Kyodo.
Sipas njerëzve të njohur me këtë çështje, presidenti Xi Jinping ka miratuar tashmë planin për të dyfishuar arsenalin bërthamor të vendit, raportoi gazeta japoneze të shtunën.
Numri i kokave luftarake të Kinës ka të ngjarë të rritet nga rreth 400 në 550 deri në vitin 2027 dhe të arrijë në 900 në vitin 2035, pohuan burimet e Kyodo-s.
Shifra e ofruar nga agjencia është më e vogël se parashikimi i bërë nga Pentagoni në vjeshtë, kur tha se pret që Pekini të ketë 1500 koka bërthamore deri në vitin 2035.
Në çdo rast, Kina do jetë ende shumë prapa Rusisë dhe SHBA-së, të cilat mburren përkatësisht me 5,977 dhe 5,428 koka bërthamore, sipas vlerësimeve të Institutit Ndërkombëtar të Kërkimit të Paqes në Stokholm.
Tensionet mes SHBA-së dhe Kinës kanë qenë në rritje që nga gushti, kur kryetarja e Kongresit, Nancy Pelosi vizitoi Tajvanin, pavarësisht kundërshtimeve nga Pekini, i cili e konsideron ishullin një pjesë të patjetërsueshme të territorit të tij. Uashingtoni nga ana e tij ka premtuar të mbrojë ishullin nëse qeveria kineze vendos ta rimarrë atë me forcë.
Në fund të janarit, kreu i Komandës së Lëvizshmërisë Ajrore të SHBA, gjenerali Mike Minihan, paralajmëroi vartësit e tij në një memo se një konflikt midis Uashingtonit dhe Pekinit mbi Tajvanin mund të shpërthejë që në vitin 2025.
