Ushtria në pushtet e Sudanit përfundoi një rishikim të një marrëveshjeje me Rusinë për të ndërtuar një bazë detare në Detin e Kuq në vendin afrikan, thanë të shtunën dy zyrtarë sudanezë.
Ata thanë se marrëveshja ishte në pritje të formimit të një qeverie civile dhe një organi legjislativ për t’u ratifikuar përpara se të hynte në fuqi. Zyrtarët thanë se Moska përmbushi kërkesat e fundit të Sudanit, duke përfshirë sigurimin e më shumë armëve dhe pajisjeve.
“Ata i sqaruan të gjitha shqetësimet tona. Marrëveshja është bërë në rregull nga ana ushtarake,” tha një zyrtar.
Zyrtarët nuk dhanë hollësi të mëtejshme dhe folën në kushte anonimiteti. Një zëdhënës i ushtrisë sudaneze nuk pranoi të komentojë.
Ministri i Jashtëm rus Sergey Lavrov tha gjithashtu të enjten se marrëveshja ka ende nevojë për ratifikimin nga organi legjislativ i Sudanit që ende nuk është formuar.
Sudani ka mbetur pa parlament që kur një kryengritje popullore çoi në përmbysjen ushtarake të Omar al-Bashir në prill 2019. Vendi është zhytur në kaos politik që kur një grusht shteti ushtarak i tetorit 2021 prishi tranzicionin e tij jetëshkurtër drejt demokracisë.
Marrëveshja, e cila u shfaq në dhjetor 2021, është pjesë e përpjekjeve të Moskës për të rivendosur një prani të rregullt detare në pjesë të ndryshme të globit. Ajo u arrit gjatë mbretërimit të al-Bashirit.
Marrëveshja i lejon Rusisë të krijojë një bazë detare me deri në 300 trupa ruse dhe të mbajë njëkohësisht deri në katër anije të marinës, përfshirë ato me energji bërthamore, në portin strategjik të Sudanit në Detin e Kuq, shkruan Breitbart.
Baza do siguronte praninë e marinës ruse në Detin e Kuq dhe Oqeanin Indian dhe do t’u kursente anijeve të saj nevojën për udhëtime të gjata për të arritur në zonë, sipas Viktor Bondarev, ish-shefi i forcave ajrore ruse.
Në këmbim, Rusia do t’i sigurojë Sudanit armë dhe pajisje ushtarake. Marrëveshja do zgjasë për 25 vjet, me zgjatje automatike për periudha 10-vjeçare nëse asnjëra palë nuk kundërshton.
Në qershor 2021, shefi i Shtabit të Përgjithshëm të Sudanit, Gjenerali Mohammed Othman al-Hussein, i tha një stacioni televiziv lokal se Khartoum do e rishikonte marrëveshjen.
Në shkurt të vitit të kaluar, Gjenerali Mohammed Hamdan Dagalo, komandanti i Forcave të fuqishme paraushtarake, zhvilloi bisedime me zyrtarë të lartë rusë në Moskë.
Pas kthimit të tij nga udhëtimi njëjavor, Dagalo tha se vendi i tij nuk kishte kundërshtime ndaj Rusisë ose ndonjë vendi tjetër që të krijonte një bazë në territorin e saj pasi ajo nuk përbën kërcënim për sigurinë kombëtare të Sudanit.
“Nëse ndonjë vend dëshiron të hapë një bazë dhe kjo është në interesin tonë dhe nuk kërcënon sigurinë tonë kombëtare, ne nuk kemi asnjë problem të merremi me askënd, rus apo kushdoqoftë”, tha ai.
