Rubla ruse ra në nivelin më të ulët gati nëntëmujor kundrejt dollarit amerikan në bursën e Moskës të hënën, pas tregtimit të paqëndrueshëm javën e kaluar dhe pritjeve për sanksione të reja të BE-së.
Monedha ra në 73.68 rubla për një dollar amerikan në tregtimin e pasdites, norma më e dobët që nga fundi i prillit. Analistët presin që rubla të mbetet nën presion deri në fund të shkurtit, kur eksportuesit do fillojnë të konvertojnë të ardhurat e tyre në valutë të huaj në rubla për të paguar taksat.
Zhvlerësimi i rublës kundrejt dollarit dhe euros është nxitur gjithashtu nga pritjet për një grup tjetër kufizimesh financiare dhe çmime më të ulëta të naftës.
BE-ja do propozojë një paketë të re sanksionesh ndaj Rusisë, e cila, ndër të tjera, do synonte katër banka ruse, duke përfshirë huadhënësin më të madh privat të vendit, Alfa Bank.
Megjithatë, dinamika e përgjithshme e rublës mbetet pozitive, tregojnë të dhënat. Ajo vazhdon të tregtohet më lartë se në janar të vitit të kaluar, përpara sulmit të Rusisë ndaj Ukrainës dhe sanksioneve perëndimore që pasuan.
