Kina do paraqesë një plan që synon zgjidhjen paqësore të konfliktit në Ukrainë, tha ministri i Jashtëm Wang Yi në Konferencën e Sigurisë në Mynih të shtunën.
Ata që bëjnë thirrje për vazhdimin e luftimeve ‘nuk kujdesen për jetën dhe vdekjen e ukrainasve’, paralajmëroi ai gjithashtu.
“Ne do paraqesim qëndrimin e Kinës për zgjidhjen politike të krizës së Ukrainës,” tha Wang, pa dhënë një afat kohor për propozimin.
“Ne do qëndrojmë të vendosur në anën e paqes dhe dialogut.” – shtoi ai.
Wang nuk përshkroi ndonjë specifikë të planit, por tha se ‘integriteti territorial dhe sovraniteti’ i atyre që janë përfshirë duhet të respektohen, si dhe ‘shqetësimet legjitime të sigurisë’ të palëve ndërluftuese.
“Sulmet ndaj stacioneve të energjisë bërthamore duhet gjithashtu të kundërshtohen”, tha ai, me gjasë në lidhje me termocentralin bërthamor të Zaporozhye, për të cilin Ukraina dhe Rusia e kanë akuzuar njëra-tjetrën për bombardim.
Kina është e pozicionuar mirë për të ndërmjetësuar paqen, tha ai, pasi ‘nuk është një palë e interesuar drejtpërdrejt, por ajo nuk qëndroi duarkryq’ që kur operacioni ushtarak i Rusisë në Ukrainë filloi gati një vit më parë.
Kina ka refuzuar t’i bashkohet regjimit të sanksioneve të udhëhequra nga Perëndimi kundër Rusisë dhe ka thelluar lidhjet e saj ekonomike me Moskën gjatë vitit të kaluar. Gjatë kësaj kohe, Wang tha se Kina mbështeti bisedimet e paqes në Bjellorusi dhe Turqi.
Ish-kryeministri izraelit Naftali Bennett ka pohuar se Kievi u tërhoq nga këto bisedime me kërkesë të Perëndimit.
