Parlamenti letonez ka lejuar qeverinë t’i dhurojë Ukrainës automjetet e sekuestruara nga qytetarët. Masa e re do zbatohet për makinat e sekuestruara për shkelje të qarkullimit rrugor, si drejtimi nën ndikimin e alkoolit.
Ndryshimi ligjor, një amendament i miratuar në një votim dërrmues të enjten, u nxit nga ligjvënësi Raimonds Bergmanis, kryetar i Komisionit të Mbrojtjes, Çështjeve të Brendshme dhe Parandalimit të Korrupsionit të parlamentit.
“Aktualisht, ne mund t’i përdorim automjetet e sekuestruara nga shoferët e dehur duke i shitur ato, duke i hequr ato nga qarkullimi ose duke i çmontuar për pjesë këmbimi,” shpjegoi ai, sipas faqes së internetit parlamentare.
“Por ne shohim se në kushtet e tanishme, ato do të ishin një mbështetje e dobishme për popullin e Ukrainës.”
Deputetët i dhanë kabinetit letonez të drejtën të vendosë rast pas rasti nëse duhet dhuruar një makinë e sekuestruar nga shteti.
Ligji që autorizon sekuestrimin e makinave nga shoferët e dehur hyri në fuqi në dhjetor dhe u përdor kundër 215 personave në muajin e parë, sipas mediave lokale.
Agjencia letoneze përgjegjëse për trajtimin e pronës shtetërore tha në atë kohë se mund të ketë nevojë për fonde shtesë për të siguruar hapësirë shtesë për magazinimin e automjeteve të sekuestruara.
Ministria letoneze e Drejtësisë parashikoi se rreth 2,500 raste do ndiqen penalisht çdo vit sipas ligjit të ri. Ai i lejon një shoferi të blejë makinën e tij me kosto të plotë, përpara një afati të caktuar.
