Kërkesa e opozitës për ngritjen e një komisioni hetimor për të hetuar marrëdhënien e kryeministrit Rama me ish zyrtarin e lartë të FBI-së, McGonigal pritet të marrë një drejtim të pakëndshëm për opozitën.
Kryetarja e Komisionit të ligjeve, Klotilda Bushka, e cila drejton dhe Komisionin e Etikës Parlamentare, deklaroi për emisionin “Pa Censurë” në RTSH se PS do të verifikojë firmat e deputetëve të opozitës për ngritjen e komisionit hetimor, pas dyshimeve të arsyeshme për falsifikim të disa prej tyre.
“Sa i takon komisionit hetimor për çështjen McGonigal, ne nuk kemi marrë një vendim. Arsyeja pae nuk kemi ecur me trajtimin e kërkesës, nuk ka qenë vetëm çështja në diskutim e ndryshimit të ligjit për komisionet hetimore. Ajo kërkesë mbart dyshimin se nënshkrimet e kolegëve kërkues nuk janë të vërteta. Mendohet se 3 deputetë të opozitës kanë firmosur kur nuk kanë qenë në Shqipëri në kohën e dorëzimit të kërkesës.” –tha Bushka.
Komisionini Etikës është vënë në lëvizje nga kryetarja e grupit socialist për një verifikim të këtij rasti. Ata janë Oerd Bylykbashi, Belind Këlliçi dhe Agron Shehaj. Do të doja të mos ishte kështu, por do të çojmë deri në fund, sepse kjo ka të bëjë edhe me integritetin e veprimtarisë së Kuvendit. Do të therresim dhe kolegët për të marrë mendimin e tyre në lidhje me këtë çështje”.- pohoi Bushka.
Më tej ajo theksoi rrugën parlamentare që duhet të ndjekë kërkesa për komisionin hetimor dhe nuk e komentoi deklaratën e kryeministrit sipas të cilit komisioni i kërkuar nga opozita nuk do të lejohet të ngrihet.
“Nuk e kam dëgjuar kryeministrin. Ju thashë se në cilën pikë jemi, por në vleresimin tim që në titull dhe në përmbajtje kërkesa është totalisht e paragjykuar dhe sa i takon rregullave të Kuvendit, nuk ka asgjë të përputhshme”- u shpreh Bushka.
