PS-ja kërkon përjashtimin e 6 deputetëve të opozitës, reagon PD: Mbledhja në shkelje të rregullores, shumica nuk ka argumente për të mbrojtur Ramën dhe përjashton deputetë

Partia Demokratike, ka reaguar për kërkesën e deputetëve socialistë për përjshtimin e 6 kolegëve të tyre të opozitës nga seancat e Kuvendit.

Në reagimin e PD-së thuhet se socialistët në mungesë të argumenteve kërkojnë që çdo seancë të përjashtojnë deputetë të opozitës.

PD thekson se mbledhja e Sekretariatit do bëhet në shkelje pasi ajo duhej të vinte 48 orë nga dorëzimi i kërkesës dhe jo 4 ditë pas saj.

Reagimi:

Deputetë të PS kërkojnë përjashtimin e 6 deputetëve të tjerë të opozitës.

Kërkesa mban firmëtar të parë Baftjar Zeqajn i cili u kap nga media duke shkelur Rregulloren e Parlamentit pasi votoi hapur për kolegen socialiste e cila nuk ndodhej në seancë.

Me këtë kërkesë rreth gjysma e grupit parlamentar të PD është përjashtuar nga seancat e fundit parlamentare. Seancën e së enjtes nuk do të jenë prezentë 8 deputetë mes tyre Kryetari i PD Sali Berisha dhe Sekretari i Përgjithshëm i PD Flamur Noka.

Me një akt të paprecedentë, socialistët në mungesë argumentesh mbrojtës për skandalin e lidhjeve korruptive të Edi Ramës dhe McGonigal, kanë zgjedhur që çdo seancë të përjashtojnë deputetë të opozitës.

Socialistët sërish në shkelje kërkojnë mbledhjen e Sekretariatit jashtë afatit, 4 ditë pas dorëzimit të kërkesës.

Sipas Rregullores, sekretariati duhej të ishte mbledhur 48 orë pas dorëzimit të kërkesës së deputetëve socialistë, pra më datë 19 shkurt.

Sekretariati për Procedurat dhe Votimet e pritet të përjashtojë deputetët e PD.